Nongpoh Risaw 27 : Ka ophis u District Sports Officer, Ri Bhoi District, Nongpoh ha ka jingsnohkti lang bad ka ophis ka BDO Bhoirymbong C&RD Block mynta ka sngi kala pynkut noh ïa ka lympung pyni sap jong ki khun samla ïa kaba la tip kum ka “Block Level Chief Minister Youth Engagement Programme 2025” kaba nyngkong halor ka phang “Empowered Youth, Empowered Meghalaya”, kaba 2 sngi ba la pynlong ha Auxilium Skills Training Centre, Khapmara kaba hap ha Bhoirymbong C&RD Block.
Ïa katei ka lympung ki samla kaba la pynlong hapoh Bhoirymbong C&RD Block la sdang hynnin ha ka 21 tarik Risaw ha kaba la wan ban plie da ka BDO ka Bhoirymbong Block ka Dr. R Talang ha ka jingdonlang u Bah Bobby L Nongbet, District Sports Officer, Nongpoh, Kong Rida Lyndem PTI ka ophis u DSO, Nongpoh lem bad kiwei kiwei.
Ha kane ka prokram kaba ar sngi kynthih ki samla kila shim bynta ha ki jingïakop bapher bapher kaba kynthup ïa ka jingïakop dro bad airong, ka jingïakop tem Guitar, ka jingïakop rwai bad shad tynrai, bad kiwei kiwei, bad napdeng kitei ki samla na ka liang ka ophis u DSO kan jied 68 ngut ki samla kiba kynsai tam ban leit ïa shim bynta pat sha ka District Level ban ïakop pyni sap pat bad kiwei kiwei ki Block na Ri-Bhoi.
Ha kane ka sngi pynkut la wan ban pynhap pyrda noh da u Damanbait Lamare, MLA Umroi Constituency ha ka jingdonlang ka BDO ka Bhoirymbong C&RD Block ka Dr. R Talang, u Bah Bobby L Nongbet, District Sports Officer, Nongpoh, lem bad ki nongtrei na ka ophis u DSO bad na ka ophis u BDO Bhoirymbong Block, ki khynnah skul bad ki nonghikai.
Ha kaba kut pat jong katei ka lympung na ka liang ka ophis u DSO ki la sam ïa ki khusnam sha baroh ki nongjop bad ïa ka syrnot sha baroh kiba la wan ban ïa shim bynta ha katei ka lympung kaba ar sngi.
