Na tiket UDP leit thep kyrteng u Bah Shitlang ban ïakhun ïa ka elekshon MLA na Sutnga Saipung

Khliehriat, Rymphang 04 : U bah Shitlang Pale, u kyrtong (candidate ) jong ka United Democratic Party, u ban ïakhun ïa ka Meghalaya Legislative Assembly Election 2023 na ka 5-Sutnga Saipung Constituency, mynta ka sngi u la wan ban thep kyrteng ha u Returning Officer ha ophis u Deputy Commissioner ha Khliehriat, u dei ruh u MLA uba la jop na ka party Congress myn ha u snem 2018. Katto katne shaphang u bah Shitlang Pale, u dei uba shong ba sah ha ka shnong Jalaphet, East Jaiñtia Hills District, u la ïa shim bynta ha ka kam saiñ hima, sima naduh u snem 1998 kum u kyrtong na ka party congress hynrei u la shah rem, khlem kynran dien, utei u rangbah u la mih ban ïakhun biang ïa ka election ha u snem 2003 bad u la jop bad poi sha ka thong, kumjuh ruh ha u snem 2008, u la jop biang na ka party congress hi, dei ha ka MLA election ha u snem 2013, u bah Shitlang Pale, u la shah rem noh, ha u kyrtong jong ka party NPP, khlem kyrtiang dien, u la mih bad ïakhun biang ïa ka MLA election ha u snem 2018 ha kaba u la jop biang, mynta ka kynti ruh u la mih ban ïakhun biang ïa kane ka election bad mynta u iakhun na ka party United Democratic Party (UDP).
Haba kren sah ki pathai khubor, utei u kyrtong na ka Sutnga-Saipung Constituency, u la ong ba u dang don ka jingkyrmen beit ba un dang jop biang, u la ong ruh ba ki jingdonkam hapoh ka constituency ki dang don shibun kiba dang hap ban pyndep, kum ki surok, ki jaka ai jingsumar bad lada u dang jop un pynurlong bad pynbiang ïa kine ki jingdonkam jong ki paidbah bad ka jingrung jong u sha ka party UDP ruh ka dei lyngba ka jingai jingmut lang ki nongkyrshan jong u hi.
Ha kane ka sngi la wan ban ia synran lang ia utei u kyrtong da ki riew rangbah jong ka party bad ki nongkyrshan jong u.