Nongpoh, Rymphang 04: Ha ka sngi kaba san ba la ailad ban thep kyrteng ïa ki kyrtong kiba thmu ban ïa khun ha kane ka election 2023 ha ka jylla, na Ri Bhoi District mynta ka sngi ki 9 ngut ki kyrtong kiba thmu ban aireng ha kane ka election ki la lah ban pyndep ïa ka jingthep kyrteng kum kita ki kyrtong ba pura ban ïa aireng ha kane ka election 2023 na ki Constituency kiba don ha Ri Bhoi District.
Kine ki kyrtong kiba la pyndep ban thep kyrteng bad ban shim ïa ka jingsmai hakhmat ki Returning Officer ki kynthp 5 ngut na ka party TMC, 1 BJP, 1 PDF, 1 VPP bad kynthup ïa u Bah Forecasting Nongrang u ban ïa khun kum u kyrtong shimet na Jirang Constituency.
Ki kyrtong ka TMC ba la thep kyrteng ki kynthup ïa u Bah George B. Lyngdoh na Umroi Constituency, u Bah Gilbert Nongrum na Umsning Constituency, u Bah Longsing Bey na Nongpoh, u Bah Sunmoon Marak na Jirang bad ka Dr. Saralin Dorphang na Mawhati Constiteuncy. Kiwei pat ki party ki kynthup ïa ka kyrtong ka BJP na Nongpoh, ka Kong Marian Maring, u kyrtong ka VPP na Umsning u Dr. Ricky J. Syngkon, u kyrtong ka PDF na Mawhati, u Bah Roswell Shadap bad u Bah Forecasting Nongrang kum u kyrtong shimet ban ïakhun na Jirang Constituency.
Kitei ki kyrtong hadien ba la pyndep ban thep kyrteng, haba ïa kynduh bad ki Nongthoh Khubor ki la pynpaw ïa ki jingthmu bapher bapher halor ka daw kaba ki mih ban aireng ha kane ka election bad kiba bun kiba la pynpaw shakhmat ka nongrim kaba ki kwah ban ïa khun ka dei hi ban wan rah ïa kata ka jingkylla hapoh ka Constituency, ha ka District bad ha ka jylla hi baroh kawei.
