Lyngngoh u Nitin Gadkari ban ïohi ïa ka jaka pynïeng kali bun mala ha Shillong: Conrad

Shillong, Naiwieng 4: U Myntri Rangbah ka Jylla Meghalaya u Conrad K Sangma ha ka sngi Balang u la plie paidbah ïa ka District School Education Office-cum-Multilevel Car Park ha Mawkhar bad ïa ka Fully Mechanised Multilevel Car Park ha Motphran ha ka jingïadon lang u Symbud Myntri Rangbah ka Jylla u Bah Sniawbhalang Dhar.
Ki ar tylli ki projek, kiba la pyntreikam hapoh ka Shillong Smart City Mission, ki pyni ïa ka jingbei tyngka kaba 38.92 klur bad shna ïa ka jaka ïeng kali kaba la pynbeit bha na ka bynta 200 tylli ki kali ha ki ar tylli ki jaka ba khapngiah tam ha Shillong.
Haba kren kum u kongsan, u myntri rangbah ka jylla u la ong ba ka leit ka wan ka dei ka mat ba hakhmat eh ha nongbah Shillong, kaba la pynsngew ym tang da ki nongshong shnong hynrei wat da ki nongjngohkai pyrthei ruh.
“Ka Sorkar bad ki tnad kiba bun ki la pyrshang ban wad ïa ka lad, hynrei ngi la sngewthuh ba ki sienjam kiba rit kum ka jingshna ïa ki surok kiba ïaid tang kawei ka liang ne ka jaka pynieng kali ha kawei ka jaka kam lah ban long ka lad kaba neh.Ban wad ïa ka lad, ngi dei ban tip balei ka jingeh ka jia,” u la ong.
U Myntri Rangbah ka Jylla ula ong ba ka Sorkar ka la jingpule bad wad bniah ïa ka jinglong jingman hapoh ka nongbah Shillong la palat shisnem shiteng da kaba pyndonkam ïa ki drone, ki dur satellite bad ka jingkheiñ ïa ki kali.
“Kawei na ki jinglap ba kongsan ka long ba katba ngi dang buh ïa ki jaka bym dei ban shah ieng kali, ngim plie lad pat ïa ki jaka ieng kali, lada phi kwah ban khanglad ïa u briew ban ieng kali shawei pat, phi hap ban ailad ia uta u briew ban ieng kali shawei pat”, u la ong.
Kata ka la pynlong ïa ka jingwad ïa ki jaka jong ka Sorkar, ki paidbah bad ki riew shimet ban tei ne shna jaka pynieng kali.Ka jaka ieng kali hajan ka Additional Secretariat ka la long kaba nyngkong, bad ka jaka pynieng kali ha Mawkhar bad Motphran ka long kaba ar.
U la pynkynmaw ba u la pyni ïa ka jaka ieng kali ha Additional Secretariat sha u Union Minister for Road Transport and Highways u Nitin Gadkari.
“U la lyngngoh ban iohi ïa ka jaka pynieng kali ha Shillong.U la kylli ïa nga mano ba shna ïa kane bad u la ong ïa ki ophisar jong u – buh jingthoh, kane ka dei kaei kaei kaba dei ban pyni nuksa ha kylleng ki jaka lum jong ka ri.Kata ka dei ka jait jingpynwandur kaba ngi la wanrah.Ngim dei tang ban iarap ïa ki briew jong ngi, ngi hynrei ngi buh ïa ki kyndon na ka bynta kiwei pat ki bynta jong ka ri,” la ong u CM.
Hapoh ka State’s Parking Policy, ka Sorkar kan bei tyngka haduh T. 1 lak na ka bynta uno uno u riew shimet ne ka imlang sahlang kiba don jaka ban shna jaka pynieng kali, ha kaba ka bhah kaba rit na ka bai ieng kali kan leit sha ka Sorkar. “Ka jinglong trai bad ka jingpyniaid kan sah bad ka imlang sahlang ne ki tari.Ka dei ka jingiatreilang kaba pynshong nongrim ha ka imlang sahlang kaba ai ka jingshakri bad ai kam ruh ïa ki samla jong ngi”, u la bynrap.