Yn pynlong ka skulbah MGU ïa ka lympung Youth Parliament, wer ïa ki samla pule ban shimbynta
Nongpoh, Naiwieng 4: Ka skulbah Mahatma Gandhi University (MGU), kaba don ha 15 mer, Ri-Bhoi District, ha ka jingïatreilang bad ka My Bharat, Ri-Bhoi, kan pynlong ïa ka lympung District Level Youth Parliament ha ka 16 tarik u Naiwieng 2026 ha Mahatma Gandhi University, Meghalaya, ban ai lad ïa ki samla pule ban pyni ïa ka sap bad ka jingtbit jong ki ha ka kren paidbah.
Haba ïakren bad ki lad pathai khubor, ka Champa Bormon, Registrar In-charge, u Dr. Mohan Bhattacharya, Adviser, u Cleanstar Barguayary, Assistant Professor, Department of Rural Development, ryngkat ka jingïadonlang ka Samla Mercy Mukhim, Assistant Professor, Department of Legal Studies, bad ka Samla Alicia Lapang, Assistant Professor, Department of English, ki la pynshai ba kane ka lympung ka long ka rynsan ban pynshlur ïa ki samla ban sngewthuh kham bñiah ïa ka synshar paidbah bad ka Riti Synshar jong ka Ri.
Ki la pynpaw ba lyngba kane ka jingïakop, ki samla kin ïoh ïa ka lad ban kyntiew ïa ka jingsngewskhem ha ka kren paidbah, ban pynpaw ïa ki jingsngew bad ki jingmut jong ki halor ki mat kiba ïadei bad ka ri, bad ban pynkhreh ïa lade kum ki nongïalam jong ka lawei.
Kane ka lympung kan long halor ka phang “One Nation, One Election” ne kawei ka ri kawei ka elekshon, bad la khot sngewbha ïa ki samla kiba hap ha ka rta kaba 18 haduh 25 snem, na ki kolej bad kiwei pat ki shlem ai jinghikai bapher bapher hapoh Ri-Bhoi District, ban wan ïashim bynta.
Ki nongpynïaid ki la pyntip ruh ba ki samla kiba lah ban jop ha kane ka kyrdan District kin ïoh ïa ka lad ban mihkhmat ïa ka district ha ka lympung State Level bad hadien kata sha ka National Level.
Ha kaba kut, ki la kyntu ïa ki nonghikai bad ki bor pynïaid jong ki kolej bad kiwei pat ki shlem ai jinghikai hapoh Ri-Bhoi District ban pynshlur ïa ki samla pule ban ïashim bynta shitrhem ha kane ka lympung, khnang ba kin ïoh ïa ka rynsan ban pyni ïa ki sap jong ki bad ban kyntiew ïa ka bynta jong ki ha ka synshar paidbah.