Thep kyrteng u Bah Kyrmen Shylla ban ïakhun ïa ka elekshon MLA na Khliehriat Constituency na ka UDP
Khliehriat Rymphang 04 : U bah Kyrmen Shylla, u kyrtong (candidate ) jong ka United Democratic Party, u ban ïakhun ïa ka Meghalaya Legislative Assembly Election 2023 na ka 6- Khliehriat Constituency, mynta ka sngi u la wan ban thep kyrteng ha u Returning Officer ha ophis u Deputy Commissioner ha Khliehriat, u dei ruh u MLA uba la jop na ka party UDP myn ha u snem 2018 bad u la bat ruh kum u myntri ha ka sorkar jylla ba ju tip ruh kum ka sorkar MDA.
Katto katne shaphang u bah Kyrmen Shylla, u dei uba shong ba sah ha ka shnong Byndihati, East Jaiñtia Hills District, u la ïa shim bynta ha ka kam saiñ hima, sima naduh u snem 2018 kum u kyrtong na ka party UDP.
Haba kren sah ki pathai khubor, utei u kyrtong na ka 6- Khliehriat Constituency, u la ong ba u dang don ka jingkyrmen ba da ka jingieid jong u paidbah jong ka constituency un dang jop biang ha kane ka kynti ruh, u la ïathuh ruh ba u la lah ban wanrah bun ki skim hapoh ka constituency bad ka skim kaba pynhun lang ïa baroh ka dei ka madan artificial turf ka ban kyntiew ruh ïa ki khun samla ha ka kam sport, kum juh ruh ki skim surok, kaba dang sahteng bad kaba u dang sngew sahnud ka dei ka surok kaba na Lumshyrmit sha Shkentalang kaba dei ka surok kaba donkam bha namar kane ka lah ban kyntiew ïa ka kam jngohkai pyrthei ha ka thaiñ bad ka lad ïohkam iohjam.
“Haba nga rung sha kane ka kam saiñ hima, sima nga sngewthuh ba ki don bun ki jingeh bad ki don ruh shibun ki kam kiba donkam ban leh na ka bynta u paidbah, na kata ka daw nga sngewthuh ba nga dang sngewdonkam ban shakri shuh shuh ïa ki paidbah bad nga la don ruh ka jingkut jingmut na ka liang jong nga ba ngan shakri ïa ki paidbah katba ki paidbah ki dang ieid bad shaniah, na kata ka daw kane ka jingshaniah ki paidbah, ka jingieid jong ki paidbah bad ka jingtrang jong nga ban shakri ïa ki paidbah nga ïaid lynti shakhmat bad ngan jop ruh da ka jingieid bad jingshaniah ki paidbah”
Kiba la ïa synran lang ïa u bah Kyrmen Shylla ki kynthup u MLA ba rim jong ka Khliehriat Constituency, u bah Justin Dkhar, ki MDC ba kynthup u bah Fineliness Bareh, u bah Lasky Rymbai, u bah Helping Phawa, u kpa u bah Kyrmen, u bah Kor Sympli, ki riew rangbah jong ka party bad ki nongkyrshan jong u bah Kyrmen Shylla.