Shillong, K’Lyngkot 14 : Ka Rymbai Shkenshynriah ka la ïoh ban thep haduh ar kol ha ka kylla miet ban ïoh pynliem noh ia ka Chipakkore da 2-0 kol ha ka jingiakhun quarter final kaba khatduh jong ka Meghalaya State League 2024 kaba long ha kane ka sngi Ba-ar ha PA Sangma Stadium, Tura.
Ia kine ki kol jong ka Shkenshynriah la ïoh ban thep da u H Rymbai ha ka minit kaba 68 bad da u I Bareh ha ka minit kaba 79, kata ruh hapdeng ka jingiakhun kaba itynnad bha kaba long ha madan ialehkai jong ka PA Sangma Stadium.
Da kane ka jingjop, ka Shkenshynriah kan donlang mynta bad ka Shillong Lajong, Ladthadlaboh bad ka Mawlai ha ka thup jong ki kynhun ban rung sha ka semi final ha kaba ia ka por yn sa rai bad pynbna pat da ka Tournament Committee shen.
Ha kane ka lympung kaba la sdang da ki 24 tylli ki kynhun la shim na kylleng ki bynta jong ka Meghalaya hynrei mynta pat kiba poi sha ka semi final ki long sa tang saw tylli, kata ar tylli ki kynhun na Shillong ba kynthup ia ka Shillong Lajong bad Mawlai, kawei na West Jaintia Hills kata ka Ladthadlaboh bad kawei pat na East Jaintia Hills kaba dei ka Shkenshynriah.
Kumban shu phaidien, ka Shillong Lajong ka la pynliem ïa ka Rangdajied United da 3-1 kol ha ka quarter final kaba nyngkong, katba ka Ladthad-laboh pat ka la pynliem ïaka Sutnga da 5-2 kol, katba ka Mawlai ka la pynliem ïa ka Khliehmawlieh da 8-0 kol.
Ïa kane ka lympung ïalehkai jong ka Meghalaya State League ba la pynlong da ka Meghalaya Football Association bad kyrshan pat da ka sorkar jylla ka la pynshongshit bha mynta ka kynti bad la khmih lynti ba ki jingïakhun kiba dang sah kin nang pynkhihwin bad pynshongshit shuh shuh ïa ki paid ieid phutbol ka jylla.
Dei tang ka Shillong Lajong bad ka Mawlai kiba la poi shaduh ka semi final jong ka MSL ha ki jingïakhun ba la dep ha kaba ka SLFC kaba dei ka lahduh ba rim ka la ïoh ban khur ïa ka nam lahduh ha u snem 2019.
Ka Niaw Wasa United ka la ïoh ban khur ïa ka jingjop ha ka lympung kaba nyngkong eh ha u snem 2018 bad ka Rangdajied pat ha u snem 2023.
