Palat 70 ngut poi ki samla sha ka lympung ai jinghikai kick-boxing ha Umsning

Nongpoh, K’lyngkot 14 : Ka All Meghalaya Kick-Boxing Association (AMKA) ha ka sngi Nyngkong, ka la plie paidbah ïa ka prokram ai jinghikai ba la tip kum ka 8th State Level Kick-Boxing Training Camp kaba shi taiew lynter ha Umsning, ka ban kut haduh ka 18 tarik u Kyllalyngkot.
Ïa kane ka jingai jinghikai la wan plie da u Bah Eddie G Kharbani, uwei na ki riewpawkhmat ka Umsning bad kyrtong ïakhun MDC ka UDP na Umsning ha ka jingïadonlang u Officer Incharge ka Umsning Police Station Elias Marak, u President ka AMKA Samuel Hashah bad kiwei kiwei.
Baroh ki la don haduh 70 ngut ki samla kynthei bad shynrang ba wan na kylleng ka Ri-lum Khasi – Jaintia ban ïashimbynta ha kane ka jingai jinghikai.
Na ka liang u Bah Samuel Hashah u la pynpaw ïa ka jingkmen ba kum ka seng kaba khmih ïa ka kam ïalehkai Kick-Boxing ha Jylla, kala lah ban wanrah ïa kane ka Training Camp ha Umsning.
Shuh shuh u pyntip ha kane ka Training Camp, kan don ka jingai jinghikai kumba 6 sngi eiei bad ki jinghikai ki kynthup ïa ka Kick-Boxing, Muay Thai, ka kam kilan met bad ruh ki lad jingïada ïalade da kaba kyrmen ba ki samla kiba wan ban ïashimbynta kin ioh ïa ki jingmyntoi kaba khraw lyngba kane ka prokram.
Na ka liang u Bah Eddie u la ai ka jingïaroh ïa ka AMKA kaba la iohi jngai halor ka jingdonkam ban wanrah ïa kum kane ka prokram ha ka dong bad ka thain Ri-Bhoi khamtam ha Umsning.