Haduh 6 tylli ki takma khur ki heprit ka MeSCMA na Arunachal Pradesh

0

Shillong, K’Lyngkot 15 : Ki thei bad ki rangïalehkai jong ka Meghalaya Sport Climbing & Mountaineering Association (MeSCMA) ki la ïoh ban khur haduh hynriew tylli ki takma na ka lympung ïalehkai kaba dang shu lah shen jong ka North East Sport Climbing Championship kaba long ha Roing, Lower Dibang Valley, Arunachal Pradesh ïa kaba la pynlong da ka IMF North East Zone Sport Climbing Committee naduh ka 09 -11 tarik u Kyllalyngkot 2025.
Kiba khur takma ha kane ka lympung ïalehkai ki kynthup ïa ka Pynkmenlang Lyngdoh kaba ïoh khur takma Rupa ha ka speed climbing bad ka Dadapbiang Lyngdoh pat ka khur takma rnong ha ka bouldering climbing ha ka thup Sub-Junior Girls.
Ha kane ka juh ka thup ka Mebalaaishisha Tham ka la wan ha ka kyrdan kaba saw, ka Aijingsuk Lyngdoh ha ka kyrdan kaba 6 bad ka Idaseisoh Tongper ha ka kyrdan kaba 7. Ha ka thup Sub Junior Boys pat u Hamebanker Nongsiej u la khur takma rnong ha ka speed climbing katba u Givensamson Lyngdoh u la wan ha ka kyrdan kaba saw bad u Mebandonlang Umsong ha ka kyrdan kaba san.
Bad ha ka thup Junior Boys pat, u Kyrmen Skhem u la ïoh ban khur ïa ka takma ksiar ha ka speed climbing, nangta sa kawei ka takma ksiar ha ka Lead Climbing bad ka takma rupa ha ka bouldering climbing.
Kiwei pat ki nongïalehkai ha ka thup Junior Boys ki kynthup ïa u Lurshai Nongkhlaw uba wan ha ka kyrdan kaba saw, u Benison Mawlong ha ka kyrdan kaba san, Atiar Nongkhlaw ha ka kyrdan kaba 6 bad u Bankyrshanlang Tham ha ka kyrdan kaba 7.
Kane ka long katkum ka kyrwoh ba la phah da ka Kong Malviancy Shabong, President jong ka MeSCMA.

Leave A Reply

Your email address will not be published.