Kumba 3500 ngut ki nongïalehkai ban mih madan ha ka Meghalaya Games

Shillong, K’Lyngkot 14 : Baroh kin don haduh kumba 3500 ngut ki nongïalehkai kynthei bad shynrang kiban mih madan ha ki lympung ïalehkai bapher bapher jong ka 6th Meghalaya Games kaban sdang naduh ka 20tarik u Kyllalyngkot mynta u snem ha West Jaintia Hills, Jowai.
Na kine, haduh 500 ngut ki dei ki nongpynïaid ïa ki jingïalehkai kiban ïakhun ha ki 25 tylli ki jait jingïalehkai bad saw tylli ki jingïalehkai kiban shu pyni (demo) ban ïa knieh ïa ki 1600 tylli ki takma.
Na ka liang u Working President ka Meghalaya State Olympic Association (MSOA), Bah John F Kharshiing lyngba ka kyrwoh u la ai ka jingkhublei ïa u Myntri Rangbah ka Jylla Conrad K Sangma bad kumjuh ïa u Myntri ka tnad Sports Bah Shakliar Warjri kiba la ïai bteng bad kyrshan na ka bynta ban kyntiew ïa ki kam ïalehkai ha ka jylla lyngba ka Meghalaya Games.
“Ka jingai khublei kaba kyrpang sha ki dkhot jong ka Meghalaya State Olympic Association (MSOA) bad ki 29 tylli ki seng ïalehkai kiba don hapoh ka shatri MSOA. Ngi ai khublei ruh ïa ki ophisar jong ka tnat Sports & Youth Affairs, Sorkar Meghalaya, ki ophisar baroh jong ka West Jaintia Hills District namar ka jingtrei shitom jong ki ban pynlong ïa kane ka jingïalehkai ka ba jop,” ong u Working President ka MSOA ha ka kyrwoh.
Ha kajuh ka por u la kyntu ruh ïa ki nongïalehkai kynthei bad shynrang ba ki shim ïa kane ka kabu ksiar ban pyni ïa ka sap bad ka jingtbit jong ki ha ki jingïalehkai bapher bapher ba ki shim bynta.
Ïa ki jingïalehkai bapher bapher kiba poi baroh 29 tylli yn pynlong ha kylleng ki bynta jong ka nongbah Jowai, Wahïajer bad Khliehtyrshi jong ka West Jaintia Hills katba ïa ki ar tylli ki jingïalehkai ba kynthup ïa ka Swimming kan long ha Caroline Swimming Pool, Shillong bad ka Golf pat kan long ha Assam Rifles Golf Course, Laitkor.
Kiwei pat ki jingïalehkai ki kynthup ïa ka Archery, Arm Wrestling, Athletic, Badminton, BasketBall, Boxing, Cycling, Football, Gymnastic, Judo, Karate-Do, Kho-Kho, Muay Thai, Shooting, Softball, Sports Climbing, Table Tennis, Taekwondo, Lawn Tennis, Volleyball, Weightlifting, Wrestling, Wushu bad ki jingïalehkai tynrai kum ka Rool Ball, Yogasana bad ka Lawn Bowling yn sa pynlong ha ki jaka bapher bapher jong ka West Jaiñtia Hills District.