Jowai, Risaw 19: Ka Diengshynrum SC bad ka Deinshalalu SC ki la jop ïa la ki jong ki jingïakhun jong ka lympung phutbol “Super Division” bad ka First Division League 2026 bala pynïaid daka East Jaiñtia Hills District Football Association (EJHDFA), kiba la long hynne ka sngi Nyngkong (19 tarik Risaw) ha Artificial Diengshynrum, Khliehriat.
Haba phai sha ka jingïakhun jong ka 6th Kyrmen Shylla Contribution Trophy League Stage 2026 haka kyrdan “Super Division”, ka Diengshynrum SC kala pynliem noh da 2-1 ïa ka Chiehruphi SYWSC. Baroh ki kol ki la wan ha ka kylla miet, ha kaba ka Diengshynrum SC ka la pynkhihjar lyngba u Khrehbha Lyngdoh (53’) bad u Hamedao Nongtdu (57’), katba ka shikol naka Chiehruphi SYWSC la thep da u Samkor Lamare (90+8’) ha ka minit pynjlan shuwa ban kut.
Nangta ka jingïakhun jong ka Thomas Nongtdu Memorial Trophy haka kyrdan 1st Division League 2026, la sakhi ïa ka Deinshalalu SC kaba la wanphai ar sien shuwa ba kan jop da 3-2 pyrshah ïaka Sutnga Mission SSCC.
Ka Sutnga Mission ka la ïoh ban lamkhmat ar sien ha kane ka jingïakhun lyngba u Elizer Slong (39’) bad u Flowerson Pala (80’). Hynrei ha baroh ar tylli ki khep ka Deinshalalu ka la ïohlad ban pynïakhaid lyngba u Khmih Rymbai haka minit ba 52 (na ka Penalty) bad 87 shuwa ba u Piyush Rymbai (90+3’) un thep ïa ka namtam ha ka minit pynjlan shuwa ban kut.
Lyngba kane ka jingjop ka Deinshalalu SC ka lah ïoh rung sha ka Quarter Final jong ka lympung ïalehkai 1st Division EJHDFA naka Pool-B.
