Delhi Half Marathon 2026: Wan ba nyngkong ka kong Kmoin Wahlang ha ka kyrdan mareh kiba la 70 snem shaneng
Shillong, Risaw 19: Iwei na ki nongïakop mareh ba pawnam ka jylla Meghalaya, kong Kmoin Wahlang i la lah ban pyndep ha ka kyrdan ba nyngkong ha ka kyrdan mareh jong kiba la 70 snem shaneng ha ka Delhi Half Marathon 2026, kaba la long ha ka sngi U Blei (18 tarik Risaw). I kong Kmoin i la lah ban pyndep ïa ka jingmareh jong i hapoh 2 kynta 19 minit bad 33 sekhon.
Ki la don hynriew ngut ki kynthei kiba la ïashim bynta ha ka kyrdan jong kiba la 70 snem shaneng ha kane ka jingïakop mareh kaba 21km, ha kaba ka kong Kmoin ka la pyndep kham kloi haduh 8 minit shakhmat ïa ka nongjop takma rupa ka Anjali Mondal (2:28:06).
Da kaba pyndep ïa kane ka jingïamareh i kong Kmoin i la lah ruh ban pyndep ïa ka ‘Procam Slam’ – ka bynta jong ki saw tylli ki jingïakop-mareh ha kylleng ka ri India ba la pynlong da ka Procam, kiwei pat ki long ka World 25K ha Kolkata, Mumbai Marathon bad ka World 10K ha Bengaluru.
Ha kawei pat ka liang, u Kresstarjune Pathaw u la wan ha ka kyrdan ba 10 ha ka ïakop mareh jong ka Elite Men’s Half marathon (ba kynthup tang ïa ki shynrang jong ka ri India). U la lah ban wan ha ka thup kyrdan Top 10 da kaba pyndep hapoh 1 kynta-8 minit bad 11 sekhon, da kaba sahdien 50 sekhon na u nongmareh uba la wan ha ka kyrdan kaba khyndai.
ïa ka namjop ha ka kyrdan mareh ki shynrang jong ka ri India la khur da u Shailesh Kushwaha (1:05:05), uba la pyndep kham kloi 3 minit bad 6 sekhon shakhmat ïa u Kresstarjune.
ïa ka nam ‘Overall winner’ naki shynrang jong kane ka Delhi Half Marathon la khur da u Charles Mbatha Matata na Kenya, uba la thaw syndon ïa ka rekod jong kane ka jingïakop uba la shimpor 58 minit bad 52 sekhon ban pyndep ïa ka jingmareh. Ka kyrdan ba ar bad ba lai la khur da u Samwel Nyamai Mailu (0:59:24) bad u Stanley Waithaka Mburu (0:59:33).
Ha ka liang ki kynthei, ïa ka nam ‘Overall Winner’ la khur da ka Wudinesh Alemu Keneni na Ethiopia kaba la pyndep ïa ka jingmareh ha ka 1 kynta, 6 minit bad 35 sekhon. ïa ka kyrdan ba ar bad ba lai la khur da ki nongmareh na Kenya, ka Selah Jepleting Busienei (1:07:01) bad ka Cynthia Chelangat Chepkwony (1:07:32).