Liem ka Sawmer ha ka Rangdajied, ka Laitkor ha ka Shillong Lajong ha ka Shillong Premier League

0

Shillong, K’Lyngkot 14: Ka Rangdajied United FC bad ka Shillong Lajong FC ki la ïoh ban khur ïa ka jingjop ha la ki jong ki jong ki jingïakhun jong ka Shillong Premier League 2024 kaba long ha kane ka sngi Ba-ar ha madan ïalehkai jong ka SSA ha madan First Ground, Polo.
Ha ka jingïakhun, ka Rangdajied ka la jop da 4-0 kol pyrshah ïa ka Sawmer SC, ha kawei pat ka jingïakhun ka Shillong Lajong ka la jop ïa ka Laitkor SC da 1-0 kol.
Baroh saw tylli ki kol jong ka RUFC ki la wan tang hapoh shiteng kylla jong ka kylla step, kata lyngba u Ieitlang Syiemlieh uba ïoh ban pynkhih jar ha ka minit kaba 16 bad ka minit kaba 30, nangta u Wansiewdor Nengnong ha ka minit kaba 19 bad u Arlangky Nongsiej pat ha ka minit kaba 23.
Kane kadei ka sien mih madan kaba nyngkong jong ka Sawmer naduh ka 02tarik u Nohprah bad kawei ruh kadei namar ka jingbun ki nongïalehkai ba kynsai kiba mynsaw bad kiba la hap ban shong ben.
Baroh ar tylli ki kol jong u Ieitlang lah ban ong ba ki rung jïa ryngkhat da ka bok. Ka kol kaba nyngkong kadei kaba u thmu ban pyllait ïa ki rangap dien bad ka bol ka la la leit beit sha kol bad ïaid lait ïa u rangap kol ban pynkhih ïa ka jar. Katba ka kol kaba ar pat watla ka syriem ha ka rukom khyrwit hynrei ka shu long ba u rangthep kol u la ïoh kham bun ka jaka ban khyrwit suk ïaka bol sha kol.
Ka jingïoh jong u Wansiew ban thep kol kadei na ka jingstet katba kawei pat ka kol kadei kaba wan lyngba ka free-kick bad lyngba ka bol kaba la pashat da u Federick, u Arlangki u la shu ïoh suk ban pyndei ïa ka sha ka kol.
Ha ka kylla miet pat ka jingïakhun ka la kham itynnad khamtam haba ka Sawmer ruh ka la jan ïoh lang ki kabu ksiar lyngba u Hamebantei Khongphai hynrei ka bol kaba u khyrwit ka leit dei ïa u dieng kol.
Ha kawei pat ka jingïakhun, ka Shillong Lajong ka la ïoh ban khur ïa ka jingjop lyngba ka shi kol kaba la ïoh ban thep da u Deibormame Tongper ha ka minit kaba 74 jong ka kylla miet, kata ha shwa ba un shah pynshong noh na ka daw ka jingmynsaw.
Lada phai sha ka jingïakhun dei ka Laitkor kaba ïoh bun bha ki kabu ksiar khamtam lyngba u Ïaryngkatlang Kharkrang hynrei ka bol kaba u la khyrwit tyngeh sha kol la ïoh ban khanglad noh da u rangap kol ka Lajong u Siwel Rymbai. Ka jingïoh jong u Deibormame ïa katei ka kol jop kadei namar ka jinglah jong u ban pynkulmar ïa u rangap dien ka liang pyrshah ha shwa ba un ïoh ban shut ïa ka bol sha kol.
Kane ka dei ka jingïalehkai ba khatduh jong ka Laitkor ha ka kylla kaba nyngkong (First Leg) da kaba jop lai sien, ïakhaid shisien bad rem san sien da ki 10 point.
Lashai ka sngi ka jingïakhun ka long hapdeng ka lahduh ha ka samoi ba la dep ka Mawlai SC pyrshah ïa ka Nongthymmai SC kaba don mynta ha ka jingïakhun ban lait na ka jingshah pynhiar kyrdan, ha ka por 2:30 baje janmiet.

Leave A Reply

Your email address will not be published.