Nongpoh, Kyllalyngkot 25: Ha kawei na ka jingjia ïa tyngkhuh Kali ha Ri Bhoi, ki 4 ngut ki briew kynthup ïa u Dribar ki la mynsaw, kaba dei hadien ba ka Kali Scorpioi kaba ki shong ka la shah tynrah ha kawei ka trok katba ki dang ïaid lynti ha ka surokbah National Highway ha Ri Bhoi District.
Kane ka jingjia ka la jia hynne ka step ha ka por 6.45 baje ei ei mynstep ha kaba la ong ba kawei ka Trok kaba don ïa u number NL 01 N – 6449 kaba dang wan na Guwahati ban leit sha Shillong ka la leit ban tynrah ïa kawei ka Scorpio kaba dang wan na Shillong ban leit sha Guwahati kaba la wan rah ka jingmynsaw u dribar bad kynthup 3 ngut ki nongshong hapoh katei ka Scorpio.
Ka khubor ba la ioh lum na ki Pulit ka Ri Bhoi, la ong ba kane ka jingjia ka la jia ka dei na ka daw ka jingñiah khlem akor u dribar trok, ha kaba ïa kitei kiba la mynsaw la rah noh mardor sha Bethany Hospital Nongpoh ban ioh ïa ka jingsumar.
La ïathuh ruh ka daw kaba la pynlong ban jia kane ka jingïatyngkhuh kali ka dei na ka daw ba ka NHAI ka dang maramot ïa ka surok 4-lane ha Dulongnar hajan Umdihar, ha kaba la pynlong ïa kawei ka surok ban ïaid lang ki Kali bad u dribar trok ha ka jingleit sha kawei ka surok ba kiew sha Shillong u la leit ban tynrah ïa katei ka Scorpio kaba dang wan na Shillong.
Halor kane ka jingjia, ki pulit ka Ri Bhoi ki la pynlong ïa ka jingtohkit ba la shem ba ka jingbakla ka dei hi na ka liang u Dirbar Trok bad ha kane ka jingjia katei ka Scorpio ka la julor kaba dei hadien ka jingshah tynrah kynsan ha katei ka trok kaba u dribar u la phet rieh noh ïa lade, ong ka tyllong khubor na ki Pulit.
