Shillong, Nailur 22: Ha ka sngi ïakhun ba khadduh na ka Zone D, ka Pyndengumiong District Sports Association ka la lah ban pynthikna ban rung sha ka wat ïakhun Quarter final ha ka Meghalaya Youth League 2024, ha ka kyrdan U-16 da kaba knieh ïa ka kyrdan ba ar na ka Zone D.
Shuwa kane ka jingïalehkai, dei ka Eastern Border Sports Association kaba la bat ïa ka kyrdan ba ar ha ka U-16 na ka Zone D hynrei ka la hap ban aireng ïa ka Pyndengumiong ha ka wat ïakhun ba khadduh na ka Zone. Hynrei ka Pyndengumiong ka la jop da 2-0 kol. Kine ki kol la pynkhih da u Aimebanshan Basaiawmoit bad u Bankeindorlang Basaiawmoit kaba la ïarap ïa ka kynhun ban knieh kyrdan na ka EBSA.
Ha kawei pat ka jingïakhun na ka Zone D, ka Mawshynrut Sports Association ka la pynliem ïa ka Mawkyrwat District Sports Association da tang 1-0 kol, nangta ka Nongstoin District Sports Association (kaba donkam tang shi point ban ïai bat ïa ka kyrdan ba nyngkong) ka la ïakhaid mar 1-1 kol bad ka Tyrsad Area Sports Association.
Ha ka thup ïalehkai ki khynnah U-14, ka Nongstoin bad ka Pyndengumiong ki ladep ban pynthikna lypa ïalade ban rung sha ka quarterfinal shuwa ki jingïakhun ha ka Sngi Saitjaiñ. Ha ka wat ïakhun ba khadduh na ka Zone, ka Nongstoin ka la jop kput haduh 8-0 kol ïa ka Tyrsad Area, bad u Ronifield Dkhar Rit u la khyrwit hat trik. Ka Pyndengumiong ka la hap ban hun ïa ka kyrdan ba ar hadien ba ïakhaid da 0-0 kol bad ka Easter Border, katba ka Mawkyrwat ka la pynliem ïa ka Mawshynrut da 3-0 kol.
Ki jingïalehkai ha ka Zone B, ha ka U-14 ka West Jaintia District Sports Association ka la pynliem da 3 kol ïa ka Saipung Block Sports Association, bad baroh lai kol la thep marwei da u Dayoohimi Laloo. Ka Amlarem Block Sports Association ka la pynliem ïa ka East Jaintia District Football Association da 4-0 kol.
Ha ka kyrdan ïalehkai U-16, ka West Jaintia District Sports Association ka la jop suk haduh 7 – 0 kol ban pynliem ïa ka Saipung Block Sports Association, ha kaba u Serene Dkhar u la pynkhih lai kol, katba ka Amlarem Block Sports Association ka la pynliem da 3 – 0 kol ïa ka East Jaintia District Football Association.
Na kane ka Zone ka WJDSA bad ka Amlarem ki ladep ban pynthikna lypa ïalade ban rung Quarter final ha ka kyrdan U-14 shuwa ki jingïalehkai ha ka Sngi Saitjaiñ, katba ka Amlarem ka dang ïaknieh bad ka Saipung ha ka kyrdan U-16. Hynrei, hadien ba ka Amlarem ka la khur jingjop ha ka wat ïakhun ba khadduh na ka Zone ka la pynthikna ïalade ban rung QF na ka kyrdan U-16.
Ha ka Zone C la sakhi ïa ar tylli ki namjop kiba shongkun na ka Shillong Sports Association kaba ïakhun pyrshah ïa ka Riwar Mihngi Football Association, ha kaba ka la jop kput haduh 11-0 kol ha ka U-14 bad da 6-1 kol ha ka U-16. U Gonestar Marwein u la khyrwit hat-trick ha ka jingïalehkai ki khynnah Under-14.
Kawei pat ka jingïalehkai ha ka U-16 la sakhi ïa ka Western Ri-Bhoi Sports Association kaba la jop da 4-1 kol ïa ka Sohra Sports Association.
Na kadaw ba bun ki jingïalehkai na kane ka zone kiba la pynkynriah, ka final round of round robin na ka Zone C kan long ha ka 28 tarik Nailur. Ka Ri-Bhoi District Sports Association (ka bym shym la ïakhun ha ka taïew ba ladep) bad ka Shillong SA ki dang ïaknieh hapdeng jong ki ïa ka kyrdan ba nyngkong.
Ha ka Zone A, kaba hap ha Garo Hills, ka la pyndep ïa baroh ki jingïalehkai round robin ha kine ki taïew ba ladep bad ki la ap bad pynkhreh sa ïa ka quarterfinal, ka ban sa long shen mynta u bnai.
