Mih 36 ngut ki riewdon sap lyngba ka Aspire Meghalaya

0

Tura, Naiwieng, 08: Palat 13 hajar ngut ki khynnah pule na ki skul bapher bapher ka jylla ki la ïohlad ban pynpaw pyrthei ïa la ki sap ki phong da ka jingïashim bynta ha ka Aspire Meghalaya District Talent Events, 2022.
Na kine ki khatlai hajar tam, tang 36 ngut ki khynnah skul ki la shah jied kum ki nongïashim bynta kiba kham tbit.
Ïa kane ka rynsan ïakop pyni sap kaba la sdang naduh u Lber, 2022 ka dei ka jingthmu jong ka Aspire Meghalaya ban pynshlur ïa ki samla khnang ba kin dup lah ban pynpaw pyrthei ïa la ka sap ka phong kaba ki don. Ïa kane ka rynsan ïakop pyni sap la pruiddak da ka Directorate of Sports & Youth Affairs ka Sorkar Meghalaya ba la kyrshan da ka State Education Mission Authority Meghalaya (SEMAM) bad la pyntreikam da ka AVENUES na kane ka jylla Meghalaya.
U Chief Advisor jong u Myntri Rangbah ka Jylla u Thomas A Sangma uba long ruh u MLA jong ka North Tura Constituency haba kren ha ka rynsan ïakop pyni sap kaba la long ha Tura ha ka sngi Baar ula ong, “nga la ïoh lad ban sakhi ha ki lai tylli ki rynsan pyni sap ha kine ki ar bnai ba ladep bad nga la ïohi haduh katno ka sap ka phong kaba ki khynnah skl ki don. Kane ka dang dei tang ka jingsdang. Ban ieng ha rynsan ka dei tang ka kylla kaba nyngkong. Ka pyrthei ka dei ka rynsan jong phi bad phi dei ban pyndonkam ïa ka.”
U la ai khublei ïa u Myntri Rangbah uba la wanrah ïa kine ki prokram ha kaba ki samla kiba dang khie dang san ki la ïoh ïa ka lad ban pyni ïa ka sap ka phong jong ki khnang ban pynshlur shuh shuh ba kin long ki nongkynti jong ka Jylla bad ka ri baroh kawei.
U Deputy Commissioner jong ka West Garo Hills District u Swapnil Tembe haba kren ha kane ka jingïalang u la ong, “nga la shang kylleng ka ri bad nga la ïohlad ban ïakren bad ki samla na kylleng ki jylla, bad nga ngeit ba ki samla jong kane ka jylla Meghalaya ruh ki dei kiba don ïa ka sap ha ka jingïohi jong nga. Nga sngew ba ka ri India bad ka pyrthei kim pat ïohi ïa kine ki jingshisha.
U Mikaya R, Marak, u samla uba dang pule ïa ka Class-XI ha Dalu Government Higher Secondary School ula ong, “kum u samla lud ngi la mad ïa ki jingshah tynjuh ban kren hakhmat ki paidbah bad ban ïakren bad ki bahalor. Kane ka rynsan ka la ai jinghikai ïa ngi ïa ka jingkordor jong ka jingim. Kane ka rynsan ka la ai jinghikai ai ngi ban kham nang kren bad ban don ka jingsngew skhem halade.
Na ki 348 ngut ki riewdonsap ba la shah jied na kine ki rynsan yn sa jied sa 3 ngut kiba kham paw da ka District Talent Committee na ki district bapher bapher. Ka District Talent Committees ka kynthup ïa ki ophisar na ka Sports & Youth Affairs bad ka tnat Pule Puthi bad kiwei kiwei.
Kum ban shu pyntip hangne ba ki 36 ngut ki riewdonsap ba la shah jied na ki District kin sa ïakynduh lang ha ka State Summit ka ban as long ha u Nohprah, 2022, ha kaba kin sa ïohlad ban pyni ïa ka sap kaba kham kyrpang khnang ban shah jied kum ki Aspire State Star.

Leave A Reply

Your email address will not be published.