Leit jngoh u Secretary ka tnad ka koit ka khiah ïa ki jaka sumar ha kylleng ka thain Garo Hills

Tura, Nailur 6: U secretary jong ka tnad ka koit ka khiah jong ka jylla Meghalaya, u Ram Kumar, u la leit jngoh ïa ka Tura Civil Hospital ha ka 5 tarik Nailur kum shi bynta ban leit jngoh ïa ki jaka sumar ha kylleng ka thain Garo Hills.
Ha kane ka jingleit jngoh, u Kumar u la jurip ïa ki tnad bad ki jingshakri ba kongsan, kynthup ïa ka jaka puid, ka ICU, ka cath lab bad ka laundry, ban bishar bniah ïa ki jingtei jong ka hospital, ka jingtreikam bad ki jingdonkam.
Hadien kata u la pynlong ïa ka jingialang bad ki doktor ba rangbah jong ka hospital, ha kaba la bishar bniah ïa ka jingtreikam jong ka Hospital ha ki katto katne snem ba la dep.
Ha ka jingialang ka la kren ruh halor ki jingeh ha ka jingtreikam bad ki bynta kiba donkam ban pynkhlain shuh shuh ban pynbha ïa ka jingsumar ïa ki nongpang bad ka jingshakri ha ki hospital.
Ka jingleit jngoh ka la ai lad ban bishar bniah ïa ki jingduna ha ki jingshakri kiba kongsan bad ban ïakren ïa ki lad ki lynti ban pynkhlain ïa ka jingtreikam jong ka hospital bad ka jingai jingsumar na ka bynta ki briew ha kylleng ka Garo Hills.