Shillong, Kyllalyngkot 16: Ka 6th Meghalaya Games 2025 ka la bteng ban sakhi ïa ki jingïalehkai phutbol kiba itynnad ha madan Kiang Nangbah ha Jowai kiba la long ha ka sngi Palei.
Ha ka jingïalehkai ba nyngkong jong ki kynthei, ka East Khasi Hills ka la khur ïa ka jingjop kaba shongkun da kaba jop haduh 11-2 kol ïa ka North Garo Hills. Ka jingïalehkai kaba ar la sakhi ïa ka West Garo Hills kaba la pynliem ïa ka South Garo Hills da 4-0 kol.
Nangta ki thei ïalehkai jong ka East Jaintia Hills ki la khur ïa ka jingjop salit da 2-1 kol pyrshah ïa ka East Garo Hills ha ka jingïakhun kaba lai. Katba ka jingïalehkai kaba khadduh ka la kut ha kaba ka South West Khasi Hills ka la jop pyrshah ïa ka West Khasi Hills da tang shi kol.
Ki jingïalehkai phutbol jong ki kynthei ha ka 6th Meghalaya Games 2025, ba la sdang naduh ka 16 tarik Kyllalyngkot, 2025, kan bteng haduh ka 25 tarik mynta u Kyllalyngkot, 2025.
Mynta ka kynti, ka Meghalaya Games kaba la buh ban plie paidbah ha ka 20 tarik Kyllalyngkot, 2025, kin don palat 3500 ngut ki nongïalehkai ki ban ïashimbynta ha ki 29 tylli ki jait jingïalehkai bapher bapher, kynthup ïa saw tylli ki jingïalehkai demo.
Haba phai pat sha ki jingïalehkai phutbol Under-17 jong ki shynrang kaba la sdang naduh ka 15 tarik Kyllalyngkot, 2025, ka East Garo Hills ka la jop da 4-2 kol ïa ka South West Garo Hills, nangta ka South West Garo Hills bad ka East Khasi Hills ki la ïakhaid da mar 1-1 kol, bad ka East Jaintia Hills ka la ïakhaid mar 1-1 kol bad ka Ri Bhoi.
