Kut noh ka lympung ‘Junior North East 3×3 Basketball Challenge 2025’ kaba ar sngi

0

Shillong, Kyllalyngkot 16: Ka lympung ïalehkai basketball kaba ar sngi ba la tip kum ka ‘Junior North East 3×3 Basketball Challenge 2025, kaba la long ha ka 15 tarik bad 16 tarik mynta u Kyllalyngkot ha Rangdajied United Performance Center, Pynthor.
ïa kane ka jingïalehkai la pynlong da ka Rangdajied United Sports Development Society ha ka jingïatreilang bad ka Touchline Basketball Academy bad la kyrshan ïa ka da ka Meghalaya AIDS Control Society.
Ha kane ka lympung kaba ar sngi lynter la wan ïashimbynta da kumba 40 tylli ki kynhun ïa kaba la pynïakhun ha ki saw tylli ki kyrdan, kata ka Under 16 kynthei bad shynrang, nangta ka Under-19 ki shynrang bad Under 23 jong ki kynthei.
Ki kynhun kiba la ïoh rah ïa ka nam lahduh ki long: ha ka Under 16 kynthei la rah da ka St Mary’s A, katba ïa ka kyrdan ba ar (Runners Up) la khur da ka St Mary’s B, ka Phibalari Kharmaw ka la ïoh ïa ka nam MVP.
Ha ka Under 16 Shynrang – ka SYM Sub Zero ka la rah ïa ka namjop, bad wan ba ar ka Tenacious, katba ïa ka nam MVP la khur da u George G Momin.
Ha ka Under 19 Shynrang – ka SYM JimJam ka la rah ïa ka nam lahduh, nangta ka Team Aditya ka la wan ba ar, ïa ka khusnam MVP la khur da u Daryll Langstieh.
Ha ka Under 23 Kynthei la rah da ka Anthonians, katba ka Khelo India ka la wan kyrdan ba ar, nangta ïa ka nam MVP la khur da ka Lynette Mylliemngap.
Ha ka sngi ba kut la ïadonlang u Bah Eugeneson Lyngdoh, President ka RUFC bad u Bah Joel Marbaniang, President Meghalaya Basketball Association.

Leave A Reply

Your email address will not be published.