Maham ka ophis u District Election Officer Ri Bhoi ïa ki kyrtong ba pynkheiñ Model Code of Conduct

Nongpoh, Rymphang 20: U District Election officer ka Ri Bhoi, u Aprit Upadhyaya lyngba ka kyrwoh ba la phah sha ki lad pathai khubor, u la pyntip ba la don ki kyrtong bad ki party kiba la pynkheiñ ïa ki kyndon jong ka Model Code of Conduct bad na ka liang ki Returning Officer ki la dep ban phah da ka jingthoh (Show Notice) ba ki hap ban ai ïa ka jubab kaba biang bad lada kim lah ban pynshai kin sa shah pynshitom katkum ki kyndon jong ka Model Code of Conduct.
Katei ka kyrwoh ka pyntip ruh ba ki kyrtong bad ki party ki la pynlong ïa ka jingïalang ïalap election khlem da pan bor na ka ophis u District Election Officer bad kane ka jingïaleh pyrshah jongki kan sa ktah ïa ka jingthep kyrteng jong ki kum ki kyrtong kiba thmu ban ïa khun na ka party kaba ki mih khmat.
U la pyntip ruh ba na ka liang ki bor ba dei peit ïa ka jingïaid beit ïaid ryntih ka election ki la shim khia ban phah da ka jingthoh sha kito ki kyrtong bad ki party kiba pynkheiñ ïa ki kyndon jong ka Model Code of Conduct bad la phah ruh ïa kitei ki jingthoh kiba dei katkukm ka Representation of people act 1952.
Shuh shuh, na ka liang ka ophis u District Election Officer ka Ri Bhoi, u la buh ruh ka jingkyrpad sha ki paidbah ka Ri Bhoi District ba ki dei ban ujor ne pyntip sha ka ophis jong u lyngba ka cvgil app/1950 na ka bynta kito ki kyrtong ne ki party kiba pynkheiñ ïa ka Model Code of Conduct khnang ba kum ki bor ba dei peit ïa kane ka election kin alh ban leh katkum ki kyndon jong katei ka aiñ kaba tehlakam na ka bynta ki nongmihhmat, ong ka kyrwoh na u District Election Officer ka Ri Bhoi.