Pan jingkyrshan biang u ma Wailadmiki Shylla sa shisien ban wanrah ïa ki projek thymmai ha Jowai

Jowai, Rymphang 19: U ma Wailadmiki Shylla u kyrtong ka National People Party (NPP) na ka 2 Jowai Constituency mynta ka sngi nyngkong ha ka jingïalap Election jong u ha Ladthalaboh Jowai ula pynsngew ïa ki project thymmai jong u kiba un pyntrei na ka bynta ka sor Jowai. Na ka liang u ma Wailad ula pynsngew kaba nyngkong u buh ka thong ban wanrah sa kawei ka project sam umbam hapoh ka Jowai, kumjuh sa kawei ka Govt College hapoh Jowai namar kumba long mynta kala buh jingeh ïa ki kmie ki kpa ban phah skul ïa ki khun ki kti jong ki shabar na ka sor Jowai.
Ula pynsngew ba u don ka thong ban pynkiew kyrdan ïa ka Ialong Civil District Hospital sha ka State Hospital kumba long ha lem nongbah Shillong bad Tura ha kaba ki paidbah nongpam kim donkam shuh ban leit phah sumar shabar ka District ne ki jaka sumar shimet.
U don ka thong ban pynkiew ïa ka kam ïalehkai Sports hapoh ka District da kaba pynmiat pynbah ïa ka madan Kiang Nangbah naduh ki jaka mareh Track, ki Light ban pynthaba ha ka por mynmiet, ki Gallery ban shong peit kai bad kiwei de. Kum u nongmihkhmat yn dang ïaibteng ban pynlong ïa ki prokram ai jinghikai na ka bynta ki khun samla ba kin tip kumno ban ïeng hala ki jong ki kjat da kaba kim donkam ban ap ïa ka kam sorkar hapeng jong kane ka juk kytduh kam bad kumjuh ïa ki Tuition ai jinghikai ïa ki samla pule ki ban ïakhun ïa ka Matric ha kane ka san snem ban wan.
Ha ka juh ka por un ïaleh katba lah wanrah ïa uwei u IAS Preincipal Secretary hapoh ka District Council da kaba ïakren bad ka sorkar jylla, kane kan ïarap kumno ban wad ki lad ki lynti ban pynmih ïa ka pisa khnang ban ïoh siew ïa ka tulop ki nongtrei bad kiwei de ki jingdonkam hapoh ka Council, ong ma Wailad.
Ula pynsngew shibun ki kam jingïarap na ka bynta ka shnong Ladthalaboh ha kaba na ka liang jong u ula kloi ban dep ai jingïarap lyngba ki skim bapher bapher khamtam ha ka por jong ka khlam Covid-19, da kaba pynïoh ruh ia ka Ambulance bad ka jingpynshan ïa Indoor Hall jong ka shnong.
Ula kyntu ïa ki paidbah nongshong shnong ka Ladthalaboh ba kin ai biang ka jingkyrshan ba pura ïa u ha kane ka kynti ban pynjop don burom ïa u, da kaba ong ba ki dang don shibun ki kam kiba u dei ban pyndep ïa ki kam pynroi hapoh jong kane ka shnong.
Ha kane ka sngi la wan ban synran lang ïa u ma Wailadmiki Shylla bad ban ai jingkren da u ma Sniawbhalang Dhar kyrtong na ka 1-Nartiang, ka kong Phidalia Toi nalor ki MDC bad kiwei de. La sakhi ruh da ki hajar ngut ki paidbah nongkyrshan kiba wan sha kane ka jingïalang.