Ko ki nongsharai Balang : To dwai, to hikai ïa ki bangeit ba kin jied da ka lynti ka hok bad jingshisha: HSPDP
Nongstoiñ, Rymphang 20: “Nga kyntu lem ïa ki nongsharai Balang kiba long ki nonghikai jong ki paidbah ka Nongstoiñ bad jong ka Bri u Hynñiewtrep, ba to phin ïa duwai lem to kyntu lem sha ki bangeit baieit jong phi, kumno ban jied ïa ki nongmihkhmat lyngba kata ka lynti jong ka hok bad jingshisha, namar ka kam nongmihkhmat paidbah ka dei ka kam ba kyntang”, ong u Bah Sanjied Kynsai Shangrit kyrtong ka HSPDP, haba ai jingkren ha ka rynsan ïalap elekshon jong ki party bapher bapher ha Nongstoiñ.
“Nga wan hakhmat jong phi ym da ka spah ka phew, hynrei da ka mynsiem jong ka jingieit bad jingsngewrit nga kwah ban thied ïa phi. Kynmaw phi ki paidbah da pyrkhat da puson ha kano ka lynti ba phi ïaid ha kane ka elekshon, namar ïoh lehse ka jingbabe kan sa wan hadien. Nga la shakri kum u nongïalam sengbhalang ha ki por ba la leit. Hynrei mynta nga don ka jingthmu ban shakri khambha ïa ki paidbah lyngba kane ka party, kaba phi phew hajar ngut ki mynsiem ba lui lui ba la ju ïai kyrshan da ki phew tylli ki snem”, u la ong.
“Phi dang kynmaw ba ha u 2019 ki nongkitkam lyngba ki Primary Unit ki la dep jied ïa nga ban ïakhun ïa ka elekshon. Hynrei, ki ba halor da ka jingburom ki la aiti noh shawei, ha kaba nga ruh nga la kynran dien bad khlem ïaknieh tiket nga la ïaineh ha ka party. Ka daw namar ngam dei u nongpynjot party hynrei u nongtei ïa ka party. Nga la don ha ka party da ki phew snem haduh mynta, ta ka daw lada phi ngeit ha ka jingpynthame jong kito ki briew kiba wan ha ka party na ka bynta ka jingmyntoi ïalade, phi la bakla jur”, u la ong.
“Ngim dei ban sngap ha ki jingpynthame, kumba la kynnoh ha kine ki taiew bad ki bnai ba la leit, ba nga la shah pynthied ïa ka tiket da kata ka seng NPP. Kine ki dei tang ki khubor lamler ki khubor kiba kwah ban pynthohbria ïa nga bad ïa ka party HSPDP hi baroh kawei, namar ngam dei u nongkhrong”.
“Wat ym ïa khñium shuh nangne shakhmat kumba phi la ju ïa khñium baroh shikatta. Lada nga jop ka kam ba hakhmat kaba nyngkong eh ka dei ka rukom thung kam thung jam hapoh Nongstoiñ. Nga hi ngam kwah ban tuklar ïano bad mano ban ïoh kam, hynrei ai u ta u ba trei shitom, u ba stad bad u ba dei hok ban ïoh, ai un ïoh shwa ïa ka kam”.
“Ñion beit ha ka symbol jong ka dur u Sing ba sa shisien ngin ïoh biang ïa ka jingjop bad ka burom ym tang jong ka party, hynrei ïa ka dong ka thaiñ, ka jaidbynriew bad ki khun ki ksiew pateng kin ïoh ïa ka jingkyrkhu lyngba ka jingsynshar kaba khuid ka bym don jingnoh shilliang ïano ïano”.
“Kam dei ban don ka jingïapher hapdeng kiba riewspah bad kiba duk, lane ka jingïapher hapdeng u ba khraw ne ba rit. Leit sha kane ka elekshon mynta ka kynti ruh da ka lynti jong ka hok bad jingshisha, kumba u Maieit Hoping u la ju kren man ka por mynba u dang don bad ngi”, ong u Bah Sanjied.