Nongstoiñ, Rymphang 20: “Nga dei u nongmihkhmat ba kham phylla ban ïa nujor bad kiwei pat, namar kiwei lada ki jop phin ïohi lada kim jop phim ïohi shuh. Nga la don lypa ha ka synshar khaddar 20 snem ban ïa don bynta bad phi ki paidbah ha ka synshar khaddar kum u Lyngdoh jong ka Hima Nongstoiñ”.
U la ong ruh, “Ki jingkylla ha ki san snem ki long to peit shwa ïa ka iew Nongstoiñ, na ka ktieh siang da ki tiles mynta. Phi la ïohi ïa ka jingtreikam jong ngi ka NPP ha kine ki san snem, namar kata wat ai ba ki jingbishni pihuiñ tang na ka daw ka kam saiñ pyrthei ban pyrshang pynthohbria, kan kham khraw ban ïa ki jingleh bha”.
“Ha u snem 2023 yn pynlong ïa ka Nongstoiñ kum kawei na ki smart town bad ka jingpynbit pynbiang ïa ki lynti syngkieng ha man ki dong, ki dei ki thong jong ka NPP. Nangta ngin wanrah ïa ki training centre na ka bynta ban plie ïa ki lad ai kam ai jam sha ki samla ba kin lah ban ieng ha la ki jong ki kjat”.
“Bun ki kren beiñ ïa ka sorkar NPP hynrei mynta ngi bun ki MLA na kiwei pat ki Constituency kiba la rung sha ka party NPP kynthup ïa u Bah Kimfa Marbaniang na Rambrai West Khasi Hills. Ki daw ki dei namar ki ïohi ïa ki kam kiba ka NPP ka leh tang hapoh ki san snem. Bun na kine ki MLA ba rung sha ka NPP ki ong ba kiwei ki sorkar ha ki 50 snem ki khlem leh, hynrei kane ka NPP ka leh kum u pud u sam bad kiwei kiwei de”, u la ong.
