Nongstoiñ, Rymphang, 20: “Ngi la mad ïa ki jingsynshar ki party riewlum ha ki snem ba la dep. Lada ngi dang kynmaw ha ka por jong u Maieit Hoping, um ju tuklar ïano ïano, um ju peit shilliang ïano ïano bad um ju tuklar lada dei ïa ki nongshong iew, ki nongbylla bad wat ha ki ophis bapher bapher um ju tuklar. Ai ka jingkyrshan jong phi, ngan bud ïa ki dienjat jong u maieit Hoping”, ong u Bah Polestar Nongsiej kyrtong ka UDP Nongstoiñ.
U la ong ruh, “Nga ong ïa phi ki samla ba ngam tuklar ïa ka thung kam thung jam, la ka long tang iwei I post ruh, ai ba kan long kaba khuid kaba laitluid. Ai ka jingkyrshan jong phi da ka mynsiem jong ka jingsngewrit bad ha ka 27 tarik ngin ïa mih lang da kawei ka sur ban ñion ha ka shap jong ka bom”.
Na ka liang u Bah Syndarson Kharbani uwei na ki nongïalam ba hakhmat ka UDP Nongstoiñ haba kyrshan ïa u kyrtong u la ther ïa ka NPP Nongstoiñ da kaba ong, “Ha kane kajuh ka rynsan ha u 2018, ki ong ba lada jop elekshon kin ai kam uwei shi ïing. Hynrei mynta thep kam syndon baroh shi ïing ïa ki briew la jong. Dang shen ngi la ïohi ha ki kot khubor ba ka seng KSU ka la thad ïa ka rukom thung kam thung jam sop sop da kane ka party NPP ha Nongstoiñ. Hato kiba kum kine ki nongthaw aiñ kin mih na ka dong ka thaiñ jong ngi”.
“Ki kop ha u Nailar jong u snem 2018 ba hapoh 180 sngi yn pyllait dewiong hynrei mynta la san snem hangno la lait uta u dewiong. Kine ki pynpaw ba ngi ki paidbah nongshong shnong ngi la shah thok”, u la ong bad bynrap, “Ka por ka la dei ïa ngi ki paidbah jong ka dong ka thaiñ ban ieng tylli kawei, namar 2018 ki la kular ïa ngi lai phew jait. Hynrei tang hadien katno ba la jop elekshon, la mih sa ki riew kynjat kriah kynjat khoh hangne ha iew”
“Ka jingshah hiar thma sop sop ïa ki paidbah ka la biang katto. Ngi la ngiah lah kdang ban sngap ïa ki kyntien kop kiba ong ba ïa ki kam pynroi kham lah ban leh ma ki san snem ban ïa ki kam pynroi ba la wanrah u Bah Hoping 50 snem. Kyndit bynriew bad ai jingsneng noh mynta ka kynti, lym kumta lada ngi thap kti mynta san minit, ngin sa thap khlieh san snem”, u la ong.
