Nongpoh, Ïaiong 24: Katkum ka shithi lane ka jingpynbna ka Khasi Hills Autonomous District Council lyngba u Deputy Secretary ka Executive Committee, ka KHADC ka la sospos kam noh shipor ïa u Bah Wanphrang Syiem Nongshai kum u Sirdar ka Elaka Sirdarship Nongpoh bad kane ka jingshah sospon kam ka la paw ruh hadien ba ka KHADC ka la phah da ka jingthoh sha u Bah Wanphrang Syiem ba u la shah sosponkam kum u Sirdar ka Elaka Nongpoh Sirdarship ha Ri Bhoi District.
Kumba la pynpaw ruh ha katei ka shithi, la sospon kam noh ïa u Bah Wanphrang Syiem Nongshai kum u Sirdar ka Elaka Nongpoh Sirdarship ka dei katkum ba la pynkup bor da ka aiñ United Khasi-Jaintia Hills Autonomous District (Appointment & Succession of Chief’s and headmen) Act 1959.
Katkum katei ka shithi ba la sospon kam, ka KHADC hadien ba la sospon kam ïa u Bah Wanphrang Syiem Nongshai kum u Sirdar ka Elaka Nongpoh Sirdarship, ka la thung plie ruh ïa u Bah Pillarstones Syiem Nongshai kum u Acting Sirdar ka Elaka Nongpoh Sirdarship, ha kaba la btah ruh ïa u Bah Wanphrang Syiem ban un aiti noh ïa ki kot ki sla ne ki jingdon jingem ka Elaka sha u Acting Sirdar ban pynïaid shipor ïa ka kam synshar khaddar hapoh ka Elaka Nongpoh Sirdarship katba kam pat pynbna da kumwei pat.
Haba la ioh ban ïa kren bad u Bah Wanphrang Syiem kum u Sirdar ba la shah sospon ha ka KHADC, u la ong ba kane ka jingleh ka KHADC ka la pynlyngngoh ïa u kum u Sirdar ka Elaka Nongpoh Sirdarship, namar haduh ba la phah ïa katei ka shithi weng kam ïa u shipor kum u Sirdar ruh ym pat tip satia ïa ka daw ba ki la sospon kam ïa u.
U la ïathuh ruh ha ka jingshisha halor kane ka jingshah sospon kam kum u Sirdar ka KHADC ka la dei ban pynpaw ïa ki daw ne ki nongrim ba la sospon kam ïa u, hynrei kaei kaba lyngngoh ka long ba u la shuh ioh pdiang ïa katei ka shithi ba la sospon kam ïa u bad khlem da pynpaw pat ïa ki nongrim ba la sospon kam ïa u, u la pynpaw.
Halor kane ka jingshah sospoan kam kum u Sirdar, u Bah Wanphrang Syiem u la pynpaw ruh ba u hap ban wad ïa ka daw tynrai kaei kaba la pynlong ïa ka KHADC ban sospon kam ïa u kum u Sirdar bad kum u Sirdar um lah ban pdiang ïa kane ka jingweng kam ba kyndit kyndit khlem da pynpaw ruh ïa ki daw tynrai ba la weng kam noh ïa u kum uta u Sirdar ka Elaka Nongpoh Sirdarship, u la bynrap.
