Khliehriat ïaïong 24 : Ki dkhot jong ka East Jaiñtia Taxi Owner and Drivers Association (EJHTODA), ha ryngkat ka jingïatreilang bad ki MVI jong ka ophis u District Transport Officer kumjuh ruh ki pulit pyniaid kali, ki la lap ba ki dang don ki kali shimet kiba dang shim kabu ban ïaknieh kamai bad kito kiba kamai local Taxi kiba ju kamai ha Khliehriat bad ha Ladrymbai, la ong ruh ba kat haduh mynta ka jingpeit ngor (Checking) ïa ki kali kiba kamai beaiñ ka dang bteng.
Ki nongïalam jong ka Association ki la ïathuh ba na ka liang u DTO jong ka East Jaiñtia Hills District, shisha na ka por sha ka por u la pynmih ïa ki hukum ba ym bit ïa ki kali shimet ba kin shim kabu ban ïaknieh kamai bad ki local taxi, hynrei pynban kane ka jingkamai beaiñ jong ki kali shimet ka dang ïai bteng hi, ym tang katta, la ong ruh ba ki don ruh ki kali kamai (local taxi) kiba kamai khlem da biang ki kot ki sla, kumta na ka liang ka EJTODA ka buh ka jingkyntu ïa kito kiba kamai beaiñ ba kin sngewbha ban sangeh noh shi syndon bad lada ki kwah ban kamai ki dei ban pynbiang pynbit ïa ki kot ki ba donkam bad ka ophis u DTO, ba kin shim ruh da ki permit ban kamai.
Ha kajuh ka por, ka Association ka kyntu ruh ïa ki nongshong kali ba kin sngewbha ban shong beit da ki kali kamai, local taxi khnang ba kan nym wanrah ïa ka jingduhnong ïa ki nongñiah kali kamai bad kumjuh ruh ïa ki trai kali.
La ong ruh ba kane ka jingdon kine ki kali shimet kiba shim kabu ban ïaknieh kamai ka wanrah ka jingduh nong ïa kito kiba kamai kali local, namar ki kali local ki hap ban siew ïa ki khajna kiba bun ha ophis u DTO katba ki kali shimet pat kim donkam ban siew eiei, ka Association ka maham ruh ba lada lap biang ïa kino kino ki kali shimet kiba shim kabu, ki dkhot kin bat beit bad kin aiti sha ki bor jong ka aiñ ban leh ïa kaba donkam kaba katkum ka aiñ, kane ka long katkum u kyrwoh na u President jong ka EJTODA, u bah Tiplang Rymbai.
