Jowai, Ïaïong 24: Ka Seiñ Raij Ialong kumba ju long man la u snem hashwa ba ki khun ki hajar kin hiar bet ia u symbai sha ki hali pynthor sa shisien kan pynlong biang ïa ka jinglehkmen Nohsakyriat bad ka Shad Sukra. Ha kaba ïadei bad kane ka Seiñ Raij ka khot bad wer sngewbha ïa baroh ki khun ki hajar jong ka Bri u Hynñiewtrep Hynñiew-skum ban wan sakhi lang ïa kane ka tamasa lehkmen jong ki khun ka Raij.
Ïa katei ka lehkmen Nohsakyriat yn pynlong ha ka 28/04/2023 ha ka por 2:00 PM bad ïa ka Shad Sukra yn pynlong ha ka sngi ba bud (29/04/2023) naduh ka por 1:00 PM. Ïa kine baroh ar ki tamasa yn pynlong ha Madan Seiñ Raij Ialong. Kane ka long katkum ka jingpyllait khubor jong u ma P. Shylla President Seiñ Raij Ialong.
