SHILLONG, Nailur 20: Ka nongbah Shillong sa shisien kan sa shlei biang da ki paid ieit phutbol hadien ba ki bor pyniaid ka Northeast United FC ki la pynbna ba ki kwah ban pynrunglang ïa ka madan JN Stadium Shillong ban pynlong ïa ka lympung ïalehkai jong ka Indian Super League (ISL) kaba dei ka lympung ïalehkai klob kaba heh tam ha ka ri India.
Kane ka khubor ba bha na bynta ki paid ieit phutbol ka jylla la pynbna da u CEO ka Northeast United FC u Mandar Tamhane haba kren ha ki lad pathai khubor ha kane ka sngi Thohdieng ha Shillong.
Ha kane ka sngi ka kynhun ïalehkai Northeast ka la wan ban ai khublei ïa ki paidbah ka jylla kiba la kyrshan haduh kaba kut haduh ba kan ïoh ban rah ïa ka nam lahduh jong ka Durand Cup. ha kane ka sngi la donlang ruh naduh u Myntri Rangbah ka Jylla Conrad K Sangma nalor ki ophisar ka tnad sports bad kiwei kiwei.
Haba ai jingkren halor kane, u CEO jong ka NEUFC – u Mandar Tamhane u la ong, “Ka ISL ka la ïatreilang ban ïoh pynlong ïa ki jingïalehkai hangne (Shillong) bad nga tharai shuwa ban kut kane ka samoi lehse ha u bnai Rymphang-Lber, ka NorthEast United ka lah ban ïalehkai ar ne-lai tylli ki jingïalehkai hala ïing (home game) ha JN Stadium.”
ïa mynta hi, ka NorthEast United kan pynlong ïa ki jingïalehkai ISL 2024-25 ha Indira Gandhi Athletic Stadium ha Guwahati, Assam shuwa ba kan kynriah sha Shillong ha Meghalaya. Katba kane ka Stadium ha Shillong ka dang hap ban pynbha katto katne ki jingduna katkum ba la ai jingmut da ka NEUFC sha ka Sorkar Jylla na ka bynta ban pynlong ïa ki jingïalehkai ISL kaba seisoh bad kaba ïaid beit ïaid ryntih.
Lah ban kdew ba ka NorthEast United FC kam dei ka klob kaba mihkhmat tang ïa kawei ka jylla, hynrei ka dei ka klob kaba mihkhmat ïa phra tylli ki jylla ka thaiñ shatei lammihngi (North East) kiba ieid ïa ka phutbol. Bad ka nongbah Shillong (Meghalaya) kadei kawei na ki jaka kaba shongshit bad ieid phutbol, bad na ka liang jong ki paidbah ki khmihlynti ba ka jingpynlong ïa ki jingïalehkai Indian Super League kan urlong.
