Shillong, Nailur 20: Kum shi bynta ban pynlong ïa ka jylla Meghalaya kum ka shlem ai jinghikai ba paw na bynta ka phutbol hapoh ka ri, ka lahduh jong ka 133rd Durand Cup 2024 – ka NorthEast United Football Club (NEUFC) ryngkat ka jingkyrshan na ka Sorkar Jylla Meghalaya kan seng ïa ka shlem ai jinghikai (Football Academy) ha Mawkhanu-New Shillong.
Ha ka jingwan ïuhkjat jong ka NEUFC ha nongbah Shillong ban pyni nam ïa ka Durand Cup Trophy ha ka Sngi Palei (19 tarik Nailur), ka klob ka la ïoh ban ïakynduh ïa u Myntri Rangbah ka jylla – u Conrad K Sangma u ba la pynpaw ba ka jingïatreilang bad ka NEUFC kan long ka jingmyntoi ka ban pynkylladur bad kyntiew ïa ka phutbol ha ka jylla.
““Ngi dang wanrah ruh shibun ki prokram ha ki grassroots level ban jied ïa ki khynnah ba donsap bad ban kyntiew ïa ki, naduh ba ki dang khynnah,” ong u Mynrti Rangbah ka jylla.
U la ïoh ruh ban ïakynduh bad ki rangïalehkai jong ka NorthEast United FC, da kaba pynpaw ba man u wei pa u wei u player u long u ‘nongai mynsiem’ ïa ki khynnah samla ka jylla Meghalaya.
“Phi la ïohi ïa ka jingieid ba ki samla bad ki paidbah ki don ïa ka phutbol; namar kata, Ngi khmihlynti ïa ka lawei kaba bha, ki jingmyntoi ryngkat ka Indian Super League bad ka NorthEast United FC kaba ïatreilang bad Ngi hapoh ka jylla. Kam dei tang shaphang ki jingïalehkai hynrei ki jingkylla kaba khraw ba Ngin sa sakhi khamtam na bynta ki paidbah kiba ieid ïa ka phutbol bad ïa ki khynnah samla kiba angnud bad kwah ban ïoh phong ïa kane ka jersey ha kawei ka sngi bad ban mihkhmat ïa ka ri ha ki kyrdan ïalehkai ba heh.”
U la pynpaw ruh ba ka jingïatreilang bad ka NorthEast United FC lem bad kiwei dei ki klob hapoh ka jylla kan pynkylladur ïa ka Meghalaya kum ka jaka pdeng na bynta ka phutbol, bad da ka jingtei ïa ki shlem ai jinghikai phutbol (football academy), ka phutbol kan sa ïoh ïa ka jingkyrshan ba ka donkam tam ban kiew.
Haba phai dien, ha ka 14 tarik u Lber, ka Sorkar Jylla ka la soi jingïateh bad ka NorthEast United FC ban seng ïa ka shlem ai jinghikai (Football Academy) ha New Shillong, ha kaba na ka liang jong ka sorkar ka la mynjur ban pynïoh ïa ka jaka kaba heh 15 acre na bynta ka klob.
Haba ai jingkren sha ki lad pathai khubor, na ka liang jong u CEO ka NorthEast United, u Mandar Tamhane, u la ïaroh ïa ka Sorkar jylla Meghalaya kaba don bynta ban kyrshan ïa ka klob ha kine ar samoi ba ladep, da kaba bynrap ba kadei kaei kaei kaba um pat ju ïohi ha kiwei pat ki jylla jong ka ri India.
“Ngi sngew kmen ba ka Sorkar Meghalaya ka la ai ïa Ngi 15 akar ka jaka ha ki bynta jong ka Shillong ban seng ïa ka shlem ai jinghikai phutbol jong Ngi ha kane ka thaiñ,” ong u Tamhane.
U la pynpaw ruh ba ka klob ka ïatreilang syndah syndah bad ka tnad jngohkai pyrthei jong ka jylla Meghalaya (Tourism Department) ban kner lane ïarap sha ki district bapher bapher ban kyntiew ïa ka phutbol ha ki grassroot level.
U la kren ruh ïa ka phang ba ka klob kan pynthikna ban thaw ïa ki lad ban sei ïa ki player na baroh 8 tylli ki jylla kane ka thaiñ bad mynta ka klob ka dang wad ïa ki player na bynta ka kynhun U-17 bad Reserved Team , ha kaba 23 ngut ki player ki la don bynta bad ka kynhun. U la bynrap ba da ka jingkyrshan na ka Sorkar Jylla Meghalaya, ka nongbah Shillong shen kan sa lah ban pynlong ki jingïalehkai Indian Super League, da kaba pynkut ba ka Shillong ka lah ruh ban kylla long kawei na ki jaka pdeng kaba paw ha ka phutbol hapoh ka ri.
