SHILLONG, Nailur 20: Ka Sohiong SC ka la ïoh ban khur pura ïa ki lai point hadien ba jop ïa ka jingïalehkai ba la long ha kane ka Sngi Palei (19.09.2024) jong ka lympung Shillong Sports Association Second Division 2024 ha SSA Ground, Polo. Shuwa kane, ka jingïakhun kaba nyngkong hapdeng ka Imson SC bad ka Umphrup SC ka la kut ha ka jingïakhaid da mar 2 kol.
Haba phai sha ka jingïakhun kaba nyngkong, ka Imson ka la ïoh ban lamkhmat nyngkong ïa ka jingïalehkai lyngba ka kol na u Amosly Nongbri (14minit) hynrei ka Umphrup ka la pynïakhaid ha ka kylla miet lyngba u Nangpynkhraw Kshiar (51minit) shuwa ban pynbud ïa ka kol kaba ar lyngba u Fredy Kharbangar (81 minit).
Watla ka por ka sah satang kumba katto katne minit shuwa ba kan sa kut hynrei na ka liang jong ka Imson SC kam shym la kynrandien satia na ka jingïakhun, ka jingtrei shitom jong ka kynhun ban shem ïa ka kol pynïakhaid ka la seisoh ha ki minit pynjlan ïa ka por lyngba u Arju L Marshillong (90+3 minit) kaba la pynthikna ïa baroh ar liang ban ïasam mar shi point.
Ha ka jingïakhun kaba ar, ka Sohiong SC ka la jop salit da shi kol ïa ka Smit SC, bad kane ka namtam la thep da u Albert Malngiang (18minit).
Ki jingïalehkai ha ka kyrdan SSA 2nd DIVISION 2024 ha kane ka sngi Saitjaiñ (21.09.2024), ha ka por 12 baje mynsngi ka PFR FA kan ïakhun pyrshah ïa ka Marbisu SC, nangta ka jingïakhun kaba bud ha ka por 3 baje nohphaisngi kan long hapdeng ka Jongksha SC pyrshah ïa ka Mylliem Lum, ha SSA Ground, Polo.
