Lum u MLA ïaki nongïalam niam, sengbhalang, nongsynshar shnong ban pynneh ïaka suk ka saiñ ha Ri-Bhoi

Nongpoh, Nailar 03: Da ka jingsngewkhia halor ka jinglong jingman haka jylla bad kiwei kiwei ki jaka, kaba la ktah shi katdei ïaka shongsuk shongsaiñ, u MLA ka Nongpoh mynta ka sngi u la lum da ka jingïalang bad ka jingïakynduh lang naduh ki nongmihkhmat paidbah, ki nongïalam niam, ki nongsynshar shnong, ki kynhun sengbhalang, ki longkmie longkpa ha Circuit House Nongpoh, ban ïa phylliew jingmut ban wanrah ïaka shongsuk shongsaiñ haka district bad khamtam ban pynkhreh ban tem ïa kino kino ki jingïakynad ne ki huri hura kiba lah ban mih ha kano kano ka por kumba ki ju don ki briew kiba thmu ban wanrah ki jingpynkulmar shnong ne ki jingïakynad.
Ki nongïalam kiba la poi ha katei ka sngi kila pynpaw ruh ba kum kitei ki jingïakynduh ka long shisha kaba donkam ha kum kane ka por watla kim pat don kino kino ki dak ki shin ka jingïakynad ha ka them Ri Bhoi hynrei kum ki khlieh nongsynshar, ki nongïalam niam kiba don ka jingkitkhlieh ki dei ban long kiba la khreh ban tem ïoh jia ba ki wan ki jingïakynad ha kano kano ka por khamtam ban phai sha u Blei kumba ka jylla jong ngi la tip kum ka jylla ki khristan.
Kawei naki daw bala pynlong ïa kum katei ka jingïalang ka dei namar ba ka Ri Bhoi District kala dei kawei naki district kaba la khleh bha ki jaitbynriew kiba shong ba sah, hynrei kumba ki sengbhalang, ki nongïalam niam, ki Dorbar Shnong, ki nongmihkhmat paidbah ki don la ka jong ka bynta haka rukom treikam ka long kaba donkam pat ban ïatylli lang hajuh khnang ba ngin nym saphret kumba ka thong hi ka long ban pynneh ïaka shongsuk shongsaiñ bad ha katei ka sngi la rai ruh ban thaw ïaka komiti jingsuk ka ban sa jer kyrteng ha ki sngi ban dang wan bad ban jied ruh ki nongkitkam.
Ki nongmihkhmat bala poi ha katei ka sngi ki kynthup ïa u Bah Mayral Born Syiem MLA Nongpoh ba dei ruh u convener, Sosthenes Sohtun MLA Jirang, Balajied Ranee MDC Nongpoh, bad kiwei kiwei ki riew pawkhmat bad ki riew rangbah naka dong Ri-Bhoi.