Shillong, Nailar, 03: U Superintendent of Police-cum-Foreigners Registration Officer (FRO) ka East Khasi Hills District, u la bthah ïa ki Manager ne ki Trai jong ki Hotel, Guest House kiba don hapoh u pud u sam jong ka District kin hap ban rejistar ïa ka User ID na ka bynta ka jingaiti ïa ka Online “C” Form. Ka ‘C’ Form ka dei ka dulir ba dei ban phah sha u FRO hapoh 24 kynta ka jingwan poi jong ki briew kiba nabar ka ri.
U FRO u la bthah ruh ïa ki Trai bad ki nongshongwai ha ki ing shimet, ki ing sah wai, ki hostel, ki skul, kolej, university, ingmane, tempel bad ki hospital ba ki dei ban rejistar kyrteng mardor lada wan poi kino kino ki briew kiba nabar ri kiba sah ne kiba pule ha kine ki jaka. Ki bor ba dei peit kin hap ban phah ïa ka ‘C’ Form bad ‘S’ Form (na ka bynta ki skul, kolej bad University) Online hapoh 24 kynta ba wan ki briew kiba nabar ri.
U FRO u la maham ruh lada lap ïa kino kino ki bym kohnguh ïa kine ki jingbthah kin ngat ha ka jingshah pynshitom ha ki kyndon bapyrkhing katkum ki kyndon jong ka Foreigners Act, 1946.
U FRO u la ong ba la leh ïa kane ban pynthikna ba ka Sorkar kan dup tip ïa ka jingdon jong ki briew kiba nabar ri hapoh ka District bad ban dup suk ban peitngor ïa ka leit ka wan bad ka ïaid ka ieng jong ki.
