Shillong, Nailar, 03: Ki shipai BSF jong ka 193 bad 4 Battalion kiba la ïoh jingtip na ki tnat syntiat ki la ïoh kurup ïa ki jaiñ Saree bad ïa ki sopti kynthei kiba shongdor kumba T.22 lak ïa kiba la thmu ban shalan be-aiñ sha ka ri Bangladesh na khappud jong ka East Khasi Hills.
Ïa kine ki mar khaii tuh la ïoh kurup da ki shipai BSF hadien ba ki snar khaii tuh ki la phet krad lailum laiwah da kaba shim kabu ïa ka jingrben ka khlaw bad iehnoh shadien ïa ki mar khaii tuh. Ki shipai BSF ki la aiti noh noh ïa kine ki mar khaii tuh sha ka ophis Custom ban leh ïa kaba donkam.
Ha ka sngi Palei, ki shipai BSF jong ka 172 Battalion ki la ïoh pyllait im ar tylli ki masi ba la shu thynnian hapoh ki ar tylli ki kali Alto ba la thmu ban khaii tuh sha ka ri Bangladesh lyngba ka khappud jong ka East Jaiñtia Hills.
Ïa kine ar tylli ki kali la ïoh bat da ki shipai BSF kiba ap pahara ha jingkieng Sonapur, East Jaiñtia hills.
Ki shipai BSF ki la ai dak ïa ki ban pynsagneh ïa ka kali hynrei ki nongñiah ki la pynher sted pynban ïa kali sha ka shnong Umkiang. Ha ka jingïakthong ki shipai BSF ki la ïoh khang kdong ïa kine ki ar tylli ki kali ba la kit ïa ki masi da kaba shu thynnian hapoh kali ha ka rukom ba isaitmet. Ki nongñiah jong kine ki ar tylli ki la lait phet da kaba shim kabu ïa ka jingrben ka khlaw.
Ïa kine ki masi ba la ïoh kurup la aiti noh sha ki Pulit ka Umkiang Out Post ban leh ïa kaba donkam.
