Shillong, Nailar, 03: Ka Jaiñtia Students Union (JSU) ha ka sngi Palei ka la aiti da ka dorkhas ha ka Myntri ka Sorkar Jylla ka Dr. Ampareen Lyngdoh ban ujor halor ka jingbyrngem byrsit jong ki jaidbynriew Karbi ïa ki Pnar kiba shong basah ha ka thaiñ Block-I da kaba maham ba ki Pnar kim dei ban thaw ïa kino kino ki kynhun sengbhalang ha kane ka thaiñ.
Ha ka jingïakren bad ki lad pathai khubor u President ka Seng u samla Trebor R. Suchen u la ong, “hynni ka sngi (Balang) ngi shu ïoh sngew ba don ki jingbyrngem byrsit na ki briew kiba khot ïalade kum ki kynhun sengbhalang kiba tan ïa ki khynnah samla ha iew ha hat ban pyntieng pynsmiej ïa ki paradoh parasnam (Pnar) kiba sah ha Block-I da kaba byrngem ba kim (Pnar) dei ban seng ïa kano kano ka kynhun sengbhalang hapoh u pud u sam jong ka Block-I.”
“Ngi sngewthuh shai ba ka daw ba ki (Karbi) kwah ban pynkbum lane ban set ïa ka shyntur jong ki paradoh parasnam namarba ka Regional Committee ban ïapynbeit pud ha ka wat kaba ar hapdeng ka Sorkar Assam bad ka Sorkar Meghalaya ka dang ïaid,” la ong u President ka JSU.
“Kane ka dei ka buit poh jong ki paid Karbi ba ki kwah ba ki paradoh parasnam jong ngi kiba sah ha Block-I kiba dei hok ban wan biang sha ka Jylla Meghalaya namarba ka dei ka kam kaba naduh u snem 1951 bad ngi tip shai ba don ka Notification na u Lat ka Jylla Assam kaba pynhap ïa ka Block-I sha ka jylla Assam. Hynrei kumba ka long mynta ki paradoh parasnam jong ngi kiba sah ha Block-I ki kwah ban wan phai sha Meghalaya,” la ong shuh shuh u Bah Suchen.
“Ka jingbyrngem jong ki Karbi ka long ban pyntieng ïa ki (Pnar) ban kren ïa ka hok bad ban dawa ïa la ka jong ka hok haba ki kwah ban wanphai biang sha la ka jong ka jylla,” la bynrap u Bah Suchen.
U la ïathuh ba ka Seng ka la kdew hapoh ka dorkhas ba la aiti sha ka Dr. Ampareen ba donkam ban don ka jingïakren hapdeng ka West Jaiñtia Hills District bad ka Hamren District bad kumjuh ruh ka jingïakren hapdeng ka Sorkar Meghalaya bad ka Sorkar Assam halor ka suk ka sain ha Block-I.
“Ngi sngewthuh shai ba ka jingshah dawa pisa ka jur bad ka jingpyntieng pynsmiej ruh ka jur. Ngi sngewthuh shai ba ki Karbi ki don la ki jong ki buit poh ban iuhroit ïa ka hok jong ki paradoh parasnam jong ngi,” u la ong.
Ka seng ka la dawa ïa ka Sorkar ban thwet ïa ki briew/kynhun kiba donkti ban byrngem byrsit bad ban pynthikna ba ki dei ban shah tian bishar hakhmat ka aiñ.
Shuh shuh ka seng ka la dawa ruh ïa ka Sorkar ba dei ban ai jingïada ïa ki paidbah ha Block-I da kaba pynshong nongrim katkum ki jingjia kiba ju ïai jia na ka por sha ka por.
Ha kajuh ka por, ka seng ka la pynsngew ha ka Myntri ka tnat ka Koit ka Khiah ïa ki jingduna jong ka Khliehriat Civil Hospital.
U President ka JSU Khliehriat Circle u Bah Livingson Sama u la ong kumba ka long mynta kane ka Hospital kaba don ha East Jaintia Hills District ka dang don bun ki jingduna naduh ka um bam umdih, ki dawai ki dashin bad kiwei kiwei ki jingduna.
` U la ïathuh ba ka Dr. Ampareen Lyngdoh ka la pyntip sha ka Seng ba kan sa leit jurip ïa kane ka Hospital ha ka 15 tarik mynta u bnai ka sngi ba kan leit pynher ïa ka lama lairong jong ka ri ha kane ka district ha ka jingrakhe ïa ka sngi laitluid jong ka ri.
Ka Seng ka la dawa ïa ka Sorkar Jylla ba kan plie biang ïa ka Centre thoh Eksamin jong ka Meghalaya Service Public Commission (MPSC) ha sor Jowai khnang ban pynsuk ïa ki samla aplai kam jong ka West bad ka East Jaiñtia Hills District ha ka leit ka wan bad kan weng ruh ïa kino kino ki jingeh ba ki nongaplai kam ki ïakynduh ha ka bai kali.
Kane ka jingdawa jong ka Seng ka long hadien ba ka Sorkar ka la khang khyrdep ïa ka jaka thoh eksamin khlem da ai ïa kino kino ki daw kiba biang.
