Shillong, Nophrah, 22: Ka PIB Fact Check Unit (FCU) ka la lap ïa lai tylli ki channel YouTube kiba pynsaphriang khubor thok ha India. Kine ki channel YouTube ki don jan 33 lak ki briew ba subscribe bad ïa ki video jong ki, jan baroh la lap ba kilong ki bym shisha, la peit palat 30 klur sien.
Kane kalong ka sien ba nyngkong haba ka PIB ka la lap ki channel YouTube ba pura bad ym tang katto katne ki post ha ka social media kiba pynsaphriang ia ki jingkam ki bym shisha. Ki jingtip jong ki channel YouTube ba la pynthikna ia ka jingshisha da ka PIB kilong ka News Headlines, ka Sarkari Update bad ka LIVE.
Kine ki channel YouTube ki pynsaphriang ia ki jingkam kiba bakla bad ki bym don nongrim shaphang ka Supreme Court of India, Chief Justice of India, ki skhim sorkar, ki Electronic Voting Machine (EVM), ki jingmap ia ki ram jong ki nongrep bad kiwei kiwei ki khubor thok. Nuksa kum ki khubor thok ba ka Supreme Court ka la rai ba ki elekshon ha ki por ban wan yn sa pynlong lyngba ki ballot paper; ka sorkar ka ai pisa sha ki briew kiba don bank account, ki Aadhar Card bad ki PAN card, ka jingkhang pyndonkam ia ki EVM bad kiwei kiwei.
La lap ba ki channel YouTube ki pyndonkam ia ki thumbnail bym shisha kiba don ia ki logo jong ki channel TV bad ki dur jong ki nongpynbna khubor ban ialam bakla ia ki nongpeit ban ngeit ba kidei ki khubor kiba shisha. La lap ruh ba kine ki channel ki buh ia ki jingpynbna ha ki video jong ki, bad ka jingkamai pisa na ka jingpynsaphriang ia ki khubor thok ha YouTube
Ka sienjam ba la shim da ka PIB Fact Check Unit kalong ka jingkhang palat shispah tylli ki channel YouTube da ka Tnat Information and Broadcasting ha ka shi snem ba la leit.
