Shillong, Nohprah, 22: Da ki spah ngut ki paidbah nongshong shnong jong ka shnong Wahthapbru ki la ïoh jingmyntoi na ka jingai jingsumar ei ba la pynlong da u Bah Michael Kharsyntiew ha kane ka shnong kaba dang hap hapoh ka North Shillong Constituency kum ka jingai burom ïa u Myntri Rangbahduh ka ri u Narendra Modi uba la wan iuhkjat ha nongbah Shillong dang ha ka 18 tarik u Nohprah, 2022 ban pynbna ïa ki song pynroi ha ki jylla jong kane ka thain Shatei Lammihngi jong ka ri India.
Ha ka jingpynlong ïa kane ka jingai jingsumar ei bad ka jingïakop pyni ïa ki khunlung kiba shait ba khlain, la sakhi lang da ka State Mahila Morcha jong ka BJP ka Gita Sarin, ka State General Secretary bad State BJP Mahila President ka Kong Judy Surong, ka State Vice President ka Kong Darihun Marbaniang bad ki Executive Members.
Haba kren ha ka jingïalang, shwa ban pynlong ïa kane ka jingai jingsumar ei, u Secretary jong ka shnong Wahthapbru u Bah Rock Dkhar u la ai khublei ïa u Bah Michael Kharsyntiew uba la pynlong ym tang ïa kane ka jingai jingsumar ei ha kane ka shnong hynrei uba ju don bynta ruh ha kiba bun ki liang ban ïarap ïa ki paidbah ha ka por ba ka khlam jingpang Covid ka la wanlynshop ha kane ka jylla Meghalaya ha u snem 2020 da kaba sam ïa ki marbam bad ki nep syaid sha ki longing kiba kham duna ka ïoh ka kot.
Ha kane ka jingai jingsumar haduh 150 ngut ki paidbah nong-shong shnong ki la ïoh jingmyntoi ha kaba ki don saw ngut ki doktor kiba la ai jingïarap ha kane ka sngi.
