Shillong, Nohprah, 22: Kum shi bynta jong ka jingrakhe Khristmas u MLA ka Mawlai Konstitwensi u Bah Process T Sawkmie ha ka Lah sngi U Blei ka 19 tarik u Nohprah u la ai Khrsitmas Gift sha ka shnong Mawlai Umjajew, kiba kynthup ïa ki tiar shet tiar tiew, ar tylli ki syntek, tyrpal, ki shuki bad ki nep syiad (blanket).
Ki tiar shet bad ki syntek, ki shuki u la aiti ha ka dorbar shnong, katba ïa ki nep syiad sha ki nongshong shnong ka Mawlai Umjajew. Nalor ki tiar u MLA u la nohsynniang ruh 20 hajar na ka bynta ka pynkhuid shnong bad u la u la ai ruh ïa ki solar light na ka bynta ka shnong.
Haba ai jingkren ha ka jingïalang u bah PT Sawkmie u pynpaw ïa ka jingkmen ba u la ïoh rakhe ïa ka Khristmas da kaba ai sngewbha sha ki nong Umjajew lyngba kine ki tiar. Ha kane ka sngi la ïoh ruh ïa ka jingkren na bah Wanseng Jyrwa, Working President UDP Mawlai, u bah Roveno Lyngdoh, na rangbah shnong bah P. Majaw ba pynïaid jingïalang bad kiwei kiwei.
Shi sngi shwa kane u MLA u la sam da ki nep syaid sha ki paidbah nongshong shnong ka Mawlai Mawtawar, Nongkohlew, Umpling Umjathang ha Mawsiat-khnam, Umrynjah bad Madan Mawkhar.
U Bah PT Sawkmie u la pynpaw ïa ka jingsngew-kmen ba ki paidbah ki la ïa poi ryntih ban pdiang ïa ki jingai kiba rit kiba u la ai da ka jingieit kum ka dak jingrakhe ïa ka Khristmas, ka jingwan long briew u Trai Jisu Khrist sha kane ka pyrthei.
Ha kane ka sngi la ïoh ruh ïa ka jingkren na Bah Wanseng Jyrwa, working president, na bah Homer Kharko-ngor, President, na bah Lamphrang Mylliem Umlong, ki dkhot ka UDP Mawlai Circle, u rangbah shnong ka Mawtawar Bah C Kharkongor, na ki rangbah dong jong ka shnong Mawtawar, na rangbah shnong ka Madan Mawkhar, Umrynjah, na u rangbah shnong Nongkohlew.
