Shu pynthame kai ka sorkar ïa ki paidbah halor ka jingplie ïa ka MCH ha Jowai : Andrew Shullai
Jowai: U MDC ka JHADC na Jowai Central Constituency u ma Awhai Andrew Shullai uba dei ruh u kyrtong jong ka TMC u ban sa ïakhun ïa ka Election MLA 2023 na ka 2-Jowai Constituency, mynta ka sngi ula ïoh ban shakhi dala ki jong ki khmat ïa ka jingtreikam jong ka Maternal & Child Health Hospital (MCH) 100 jingthiah ha Panaliar, Jowai hadien bala dep plie ïa ka da u Myntri Rangbah ha kane ka 4 tarik mynta u bnai.
Phewse haba une u nongmihkhmat paidbah ula poi ha katei ka Hospital kala wan rah ka jinglyngngoh kaba khraw ïa u ma Andrew ban lap ba katei ka jaka ka dang thylli khlem pat sdang treikam satia bad kiba bun ki bynta jong kane ka Hospital ki long kiba khang tala khlem don satia wat tang uwei ne kawei ruh ki nongtrei jong ka tnat ka koit ka khiah.
Halor kane u ma Shullai ula kynthoh jur ïa kane ka jingleh jong ka sorkar namar kumba long mynta ha ka jaka sumar jong ka Jowai Civil Hospital Ialong kala buh jingeh ïa ki nongpang khamtam ki longkmie kiba leit kha khun bad kiba la hap ruh ban thiah ha ki madan bad ha ki lynti iaid.
U ma Shullai haba kren sha ki nongthoh khubor ula ong ba kane ka jingwan plie mawnongrim jong u Myntri Rangbah ba la plie paidbah ïa ka MCH ha kane 4 tarik u Nohprah ka long tang ka jingpynthame ïa ki paidbah ka Jowai Constituency bad ruh ïa nongshong shnong jong ka Ri Lum Jaiñtia hi baroh kawei.
“Kum ki paidbah nongshong shong ha ka por ba la wan plie ïa u Mawnongrim jong kane ka Hospital kala pynkmen shikatdei eh ïa ki, hynrei haba ïohi pat mynta ka sngi ïa ka jinglong jingman jong kane ka jaka sumar haduh mynta ruh kam pat la treikam satia bad kane ka wanrah kylla ka jingsngewsih bad ka jingduh mynsiem kaba khraw ïa kiba bun ba lang”, ong u ma Shullai.
Kumta na ka liang jong u ma Andrew ula pynpaw ka jingsngewkhia kaba jur halor ka jinglong jingman jong ka kane ka jaka sumar Maternal & Child Health Hospital (MCH) namar kumba long mynta kane ka MCH kala dawa eh ïa ki nongpang kiba donkam jingïarap ha kum kine ki por. Da kaba pynsngew wat na ka liang ka sorkar ka la dep ban thung ïa ki nongtrei ha kane ka jaka sumar hynrei shaei pat ki don bad mynta kila shu bam ei ïa ka bainong (tulop) khlem ka jingtreikam.