Pynshai paidbah u bah Damewanhi ba shah ktah ka pule puthi ha Khliehriat Constituency

Khliehriat, Nohprah 22: U bah Damewanhi Rymbai, uba dei u kyrtong jong ka Voice of the People Party (VPP) uba ïakhun na ka 6-Khliehriat Constituency, uba dang ïai bteng mynta ban ïalap election khamtam eh ban pynshai paidbah shaphang ka elction kaba khuid ba suba (Clean Politic), haba kren ha kawei na ki rynsan, u la pynpaw ka jingsngew khia halor ka jingshah ktah ka pule ka puthi hapoh East Jaiñtia Hills District, khamtam hapoh ka 6-Khliehriat Constituency kaba na ka daw ka jinghiar kynsan ka kamai ka kajih jong ki paidbah.
Utei u rangbah, u la ong ba na ka daw ka jinghiar ka ioh ka kot, ki kmie ki kpa kim ïohlad shuh ban phah ïa ki khun sha ki jaka pule kum ki skul kiba kham bha kiba don ha Khliehriat, Rymbai, Ladrymbai bad sha Jowai, hynrei ki hap ban phah ha ki skul shnong bad ynda ki la lait na ki skul ruh ki shem jingeh ban phah sha ki college kiba rem kiba don hapoh ka District namar ba kim dei ki college sorkar, haba kren halor kane ka phang, u la pynpaw ba ka la dei shisha ka por kaba la i donkam bha ban don noh ka college sorkar hapoh East Jaiñtia Hills District, namar lada don noh da ka college sorkar kan ïarap shibun ïa ki khynnah pule kiba wan na ki longiïng kiba duk ba kyrduh ba kin ïoh lad ban bteng ïa ka jingpule bad ban lait ruh na ka jingïa knieh jaka ha Kiang Nangbah College kaba don ha Jowai “Ngi ha East Jaiñtia Hills District ngi donkam bha ban ioh ïa ka Government College” ong u bah Damewanhi.
Haba krren pat shaphnag ka shlem ai jinghikai kum ka skul JNV, kaba don ha shnong Rymbai, u la ong ba donbok ba ka shnong Rymbai ka la ai jaka ïa kane ka skul bad la ïoh ban sdang ïa ka skul watla ka jingtei jong kane ka skul kam da long kaba bit ba biang bha bad ha ka jingwad jingtip jong u la ong ba kat haduh mynta na ka liang ka sorkar pdeng kam pat shym la pyllait satia ïa kano kano ka mang tyngka ban pyn heh bad pyn bha ïa kane ka skul bad ki dang don shibun kiba dang duna ha kane ka skul.
“Ha man la ki shnong ki don ki Lower Primary school, ki Upper Primary School, isynei bha haba peit ïa kine ki skul, nga ruh nga dei u nonghikai uba dang shu iehnoh shen ïa ka kam myn ha kine ki khyndiat bnai, nga isynei haba nga peit naduh ki ïing skul, ki nonghkai, ki khynnah skul bad kiba leit ha kine ki skul shnong ki dei kito ki khynnah kiba na ki long ïing ba duk katba kito kiba dang ïoh lad malu mala pat ki phah pule sha ki skul kiba la kham bha kum sha Khliehriat, sha Rymbai, sha Ladrymbai, sha Jowai, hynrei nga pynshai ba lada nga wan ha ka bor bad lada nga poi sha ka thong kine ki skul kin nym long kumne, nga kular ba baroh ki shnong kin don ka jingbit jingbiang (standard) ha ka pule puthi, ha kajuh ka por nga pynshlur ïa ki kmie ki kpa ba ym dei ban ñiewbeiñ ïa ki skul kiba don ha ki shnong hynrei ban ïaleh ban kyntiew ïa ki, ngam kwah ruh ba ki School Managing Committee kin dang pynlong fete ban pynmih pisa hynrei ki nongmihkhmat ki dei ban don kata ka mang tyngka kaba biang na ka bynta ki skul ka ban long ka jingmyntoi, balei nga kren ïa kane ka dei na ka daw ba nga ruh nga dei u nonghikai bad u dkhot ka SMC mynshwa, man ba ngi pynlong fete ngi ki nonghikai ki shah kren haba ngi pan pisa ban ïarap lem ban pynïaid ïa ka kam” bynrap shuh shuh u bah Dame.
Haba kren shaphnag ka Residential school kaba don ha shnong Byndihati, u la ong ba ha ka por ba jop election u bah Justine Dkhar u la rah ïa kane ka skul sha shnong Byndihati, ha kaba ha ka jingshisha katkum ka prposal ïa kane ka skul dei ban shna ha shnong Bataw hynrei la rah noh pynban sha Byndihati bad ynda la rah sha Byndihati hajan shnong Umtyra, ïa ka kane ka skul ym pat shym la lah ban pyntreikam haduh mynta ruh bad kane ka long ka jingjah burom bad bynrap ruh ba “kane ka dei ka dak ka shin ba ki paidbah ki dei ban sngewthuh ba ki nongmihkhmat kim treikam eiei haba ïa ka jingtei kaba da ki klur la sdang hato balei pat ym lah ban pyntreikam ïa ka, balei ym thung ïa ki nonghikai, ki nongtrei ba ki khynnah ruh kin ïoh ban leit skul ha kane ka Residential School, u la ïathuh shuh shuh ba ha ka jingjurip jong u,u la lap ba bun ki tiar ki tar kum ki wire ki la shah tuh bad ki ïit ki la pait lut bad la i pynban kum ka ktem awria , ka ktem ki kam sniew kaba la i kamkai, kane dei kaba u la ïathuh ba ki paidbah kin tip ïa ka jingshisha.
Kawei ruh ka shlem ai jinghikai ïa ki nonghikai, ka DIET kaba don ha shnong Byndihati, la ong ba “Kane ruh ka dei ka project kaba da ki klur tyngka, hynrei sngewsih ban ïohi ïa ki jingbym treikam ki shlem treikam kiba donkam, na ka liang ki bor shnong ki la pyrshang ban pyntreikam ïa kane ka DIET Campus hynrei ka jingbym don mon ki nongmihkhmat kane ka shlem ka duh ka dam noh, balei ba kim pyntreikam ïa kane namar ba kim ïoh jingmyntoi ei ei na kane, ïa ka building la dep shna, sa tang ban shu pyntrei kam, lehse imat ba kim sngew ïoh jingmyntoi kumta ki shu iehnoh kumto bad kim sngew donkam ban pyntreikam ïa kane ka shlem, haba leh kumne ka jingduh nong ka dei ïa ki paidbah nongshong shnong.”