Shillong, Rymphang 23: Ka Mawlai SC, kaba dei ka lahduh ba ïada ïa ka burom jong ka OC Blue Shillong Premier League 2024 ka la nang bteng ban pynjlan ïa ka jingïalam jong ka ha ka kyrdan ba ha khlieh duh da kaba pynliem ïa ka Sawmer SC da 1-0 kol ha ka jingïakhun kaba ar ha ka sngi Saitjaiñ ha madan First Ground – SSA Stadium, Polo.
Katba ka jingïakhun kaba kham hashwa la sakhi ba u Samborwell Mynsong u la ïoh ban thep hat-trick ha kaba ka Laitkor SC ka la pynjemkhnap ïa ka Ryntih FC da 8-1 kol.
U Donlad Diengdoh (36′) u la pynkhih ïa ka shi kol na bynta ka Mawlai pyrshah ïa ka Sawmer kaba ïakhun tang shiphew ngut, katba u Samborwell (20’, 47’, 59’) u la kylla long u player ba khyndai (uba nyngkong na ka Laitkor) mynta ka samoi ban ïoh hat trik. Ki paralok jong u ba kynthup ïa u Moonstar Nongsiej (19’, 53’), u Wadskhem Marbaniang (48’) bad u Sandy Kharkongor (57’, 63’) ruh ki la ïoh ban rung ha ka thup thep kol ha kane ka jingïalehkai, katba u Mangkara Sun (39’) u la ïoh ban thep ïa ka shi kol na ka Ryntih.
Kane ka resol ka mut ba ka Mawlai mynta ka la kamai 38 poiñ na ki 14 tylli ki jingïakhun, bad tam 5 poiñ ïa ka Shillong Lajong FC kaba don ha ka kyrdan ba-ar ha kaba baroh ar ki sah satang saw tylli ki jingïalehkai ban ïakhun. Ka Laitkor ka la ïoh ban tam ïa ka Langsning FC ban wan ha ka kyrdan ba saw da kaba kamai 23 poiñ bad ka Laitkor ka dang don ïa ka jingïalehkai ha kti. Na ka bynta ki ar tylli ki kynhun ba mad ïa ka nam rem, ka Sawmer ka don ha ka kyrdan kaba hynñiew bad ka Ryntih ha ka kyrdan kaba shiphew.
Kin don ar tylli ki jingïalehkai mynta ka sngi Nyngkong, ha kaba ka jingïalehkai kaba nyngkong kan long ha ka por 11 baje mynsngi hapdeng ka Shillong Lajong FC bad ka Nangkiew Irat SC. Nangta, ha ka por 3 baje nohphai sngi, ka Nongrim Hills kan aireng pyrshah ïa ka Nongthymmai SC.
