K a jingñiew vote MDC elekshon kan mynta ka 24 tarik u Rymphang bad katno na kiba rim kin dang wanphai biang bad katno ki ban hap song bad rah bedding noh bad katno pat na kiba thymmai, la kidei ki kyrtong thymmai, ki kyrtong shimet bad katno tylli ki seng saiñ pyrthei kin poi ha KHADC bad JHADC.
Ka phang kaba hakhmat eh ba bun na ki kyrtong ha kine ki sngi ki kren beit ïa ka Article 371, hynrei ïa ka kaiphod jong U Comptroller and Auditor General, ka la pyni, ba ki don 15ngut ki MDC, kiba la pyndonkam bakla ïa ka T.68 lak kaba dei ka pisa kaba la ai bhah ïa ki bad kaba shongdor mar T.4 lak sha uwei U MDC, halor ka skhim, kaba la ai kyrteng “special town and rural welfare programme” kaba la bei sha ki ha u snem 2018 bad ka jingbym ai jingkheiñ, ïa katei ka jingpynlut ïa ka pisa, ka buh jingartatien kaba khraw ïa ka ophis jong U CAG, ïa kine ki mat ym don satia kiba la ïakren kiba dei ki mat kiba kongsan bha ba kidei ban leh.
Ym tang katta, kaba la i shyrkhei sat, ka dei pat halor ka rukom thungkam jong ka EC jong ka KHADC, haduh 82 ngut ki nongtrei ha katei ka ophis ha ki snem 2018-19 bad la ïathuh ba ki don haduh 82 ngut ki nongtrei, kiba la thung ha katei ka ophis, khlem kano kano ka jingpynbna paidbah bad kane ka dei ka jingleh tuh kaba la shyrkhei sat, da ki MDC, kiba don ha ka Executive Committee ha katei ka por.
Lyngba katei ka kaiphod jong U CAG, ka la donkam kyrkieh, ba kan don ka kynhun, ka ban tih tyllong ïa kine ki jingshisha bad ba kito kiba bam duh ïa katei ka T.68 lak bad kito kiba thungkam beaiñ ïa ki 82 ngut, ki dei ban shah tian bishar bad ba kin shong phatok. Kam dei tang katta, ka la dei ruh ïa ka EC kaba thymmai ba kan weng kam lut ïa kitei ki 82 ngut, namar ba la thung ïa ki, khlem ki kyndon kiba biang, hynrei, ba la shu thung beaiñ ki MDC kiba don ha katei ka por bad kumta ka donkam ban sei madan ïa kitei ki 15 ngut kiba bam tuh ïa ki skhim sorkar bad nangta sa ïa kiba thung beaiñ ïa kitei ki 82 ngut ba u paidlang ka jylla, un tip ïa ki kam buit tuh jong kitei ki dkhot kiba ngi la jied ba kin leit ban pynneh pynsah ïa ki riti dustur, ym ba kin leit thung kam beaiñ ne bam tuh ïa ki skhim.
Ka jinglap jong ka kaiphod U CAG, ka long kaba jaboh haduh katta katta bad kumta ka donkam ïa ki sengbhalang ne ki seng saiñ pyrthei, kiba don ha ka jylla, lada dei ka BJP, ne ka Congress, kiba dei ki seng heh jong ka India bad nangta sa kiwei ki seng saiñ pyrthei ka jylla, kum ka UDP, VPP, KHNAM, TMC ba kin shim khia bad pynbor ïa ka sorkar jylla lane wat lada ki dei ban leit sha kashari ruh, ban thaw da ka jing tohkit, halor katei ka jaboh jabaiñ, kaba la bam duh ïa ka bhah jong u paidbah, da kine ki jingthungkam beain bad ki jingpynjah rngai ia ki skhim jong u paidbah, da ki MDC, kiba don ha katei ka por bad lada ki dang shah jied biang ïa kum kine ki riew bam duh ïa ka spah jong ka Council, da ki kam thap myntoi shimet jongki bad lehse lada la sei ïa kitei ki jaboh jabaiñ, mano ban tip, ba kine ki juh, ki dang lah ban nang pynjyrsieh shuh ha ki snem kiba hadien bad ïa katei ngin sa nang ïohi, lyngba ki kaiphod, kiba U CAG, un dang pynbiang biang ha ki snem, ki ban sa wan bad lada dei ban pynshitom ruh dei ban leh katkum ka aiñ, namar khlem ïa ki ba kin leh ki kam bamsap hynrei ba kin thaw aiñ bad ïada ka khyndew ka shyiap bad ki riti dustur.
