Ka lehniam Mawkynthei, ki sakhi ki ïeng wat ki kynthei bym ïoh khun ki leit kyrpad bad ïoh kumba ki kwah

Nongpoh, Rymphang 23: Ka Seng Khasi Kmie lem bad ka Seng Khasi Marngar mynta ka sngi ka la pynlong biang ïa ka jinglehñiam Mawkynthei ba shisien shisnem ha ka shnong Umkaduh, Raid Nongsohbar ha Ri-Bhoi District ban nguh ban dem ïa katei ka Mawkynthei kaba la ñiew kum ka Mei ieid ka Mei rad, ka Blei kaba ri ba ker ba kdup bad sumar ïala ki khun ki hajar hapoh ka Raid ban lait na ki nem sniew bad ka pang ka shitom bad kum ki khun ki hajar kiba ngat ha ka lanot ki ju leit ban nguh ban dem ban kyrpad kyrpon na katei ka Blei ha katei ka jaka, bad kaba sngew phylla ka long ba wat ki kynthei ki bym ïoh khun ki leit ban kyrpad na ka Blei bad ïoh ïa ka jingkwah bad ka jingangnud jong ki.
Ki riew tymmen, riew san jong ka seng Khasi Kmie naduh u Bah Donbokstar Kurka lang, Dallingstone Khongsit, ki la hiar sha katei ka shnong mynta ka sngi ban pyndep ïa ka kñia ka khriam ha ka jingdonlang ka Majuni Syiem, Syiemsad jong ka Raid Marngar, Bah Rubi Binong President ka Seng Khasi Marngar bad kiwei kiwei ki nongïalam ka seng Khasi.
Kum ban shu kdew hangne, kane ka jinglehniam ka la sdang ban duh ban dam, hynrei dei ha u snem 2017 ba ka seng khasi Kmie kaba la pynim biang ïa katei ka lehniam ha katei ka shnong ba don u Mawkynthei ba ki khun ki hajar ki ju leit ban nguh ban dem ban duwai bad kyrpad kyrpon na katei ka mei ieid kaba la kheiñ kum ka Blei.
Ha kane ka sngi, ki riew tymmen riew san ki la pyndep ïa ka jinglehñiam da ka kñia ka khriam ban ainguh aidem ïa ka Blei ban bha ban miat ki khun ki hajar ha ka Raid baroh kawei.
Ka Majuni Syiem, Syiemsad jong ka Raid Marngar haba kren ha katei ka sngi ka la pynpaw ba kum ki khun ki hajar hapoh ka raid ki kheiñ burom ïa katei ka Mawkynthei kaba la kheiñ kum ka mei ieid ka mei rad ka Blei bad ki sakhi ki don ruh ba ki longkmie ki bym ïoh khun ki leit ban kyrpad kyrpon ban nguh ban dem bad ïoh katkum ka jingkwah bad ka jingangnud jong ki bad kum ka jingsngewnguh ki ai ruh da ka jaiñ kyrshah hadien ba ki la ïoh ïa ka jingkwah ka jong ki.
U Bah Dallingstone Khongsit, riew tymmen riewsan jong ka seng Khasi kmie haba kren ha katei ka sngi u la ong ba ngi burom arti arjad ïa kane ka Mawkynthei kaba la long ka meirad, ka jingthaw ba buh da u Blei bad kane ka dei ka jutang myndai naduh ba dang hok ka pyrthei, dang lung ka sngi bad dang jem u bnai ba ki briew ki dang ngeit shisur.
La ong ruh ba kiba iap kim ju thang ne tep, hynrei ki kylla maw noh bad kane ka sah ka dak ka shin ha ka dur kane ka meirad, namar ki briew hi kiba dang kylla maw kim dei kiba jaboh, hynrei kiba hok bad ym ju don ba nud ban ktah kti ne lushia bad ha ka por ba ka jingim ha pyrthei ka kut noh, ki sa kylla maw noh bad kane ka dei ka jutang kaba naduh hyndai.