Shillong, Rymphang 23: Ka Meghalaya Sport Climbing and Mountaineering Association [MeSCMA] ka la pynkup burom ïa saw ngut ki nongkiew lum kiba la khur takma ha ka North East Zone Championship 2025 ha ka jingïalang jong ka Annual General Body Meeting ba la long ha nongbah Shillong ha ka 22 tarik Rymphang, 2025.
Ha kane ka juh ka sngi na ka liang jong ka General Body ka la jied bad mynjur ïa ki dkhot ba thymmai jong ka Executive committee na ka bynta ka samoi treikam jong u snem 2025 haduh 2029. Ha kane ka jingïalang la ïadon ryngkat ruh da u Bah Pynbianglang Laloo, Asst Secretary ka MSOA kum u Observer.
Kine ki long ki kyrteng jong ki nongkitkam ba thymmai jong ka MeSCMA, ka Kong Malviancy Shabong ka la shah jied kum ka President, nangta u Dr W W Phira kum u Vice-President, ïa ka kam General Secretary la bynshet ha u Bah Wallambok Lyngdoh, katba ïa ka kam Assistant Secretary sha u Bah Teimiki Sungoh, u Bah David Laloo u la shah jied ban long kum u Treasurer.
Nalor kine la ïoh ruh ban jied ïa san ngut ki dkhot jong ka Executive Members, kine ki kynthup ïa u Bah Fullmoon Lyngdoh, u Pilaster Nongsiej, ka Kayleigh Petra Nongkynrih, u Anthony Nongrum bad u Teiboklang Wanniang.
Lah ban kdew hangne ba ka Meghalaya Sport Climbing and Mountaineering Association (MeSCMA) naduh ba la seng ïa ka ha u snem 2002 ka la kyntiew ïa ki kam ïalehkai bad ka Sport Climbing ha kylleng ki District hapoh ka Jylla ryngkat ka jingïatreilang bad ki tnad sorkar bapher bapher kum ka Nehru Yuva Kendra nangta bad ka ophis treikam jong ka District Sports ryngkat ka jingkyrshan na ka tnad Sports jong ka Sorkar Jylla bad na ka Meghalaya State Olympic Association.
Mynta u snem ïa ka Sport Climbing la pynrung kum kawei naki jingïakob ha ka 6th Meghalaya Games 2025 bad katto katne ngut ki nongïalehkai na Garo Hills ki la khur ïa ki takma ha ka sien ba nyngkong na ka bynta ka District jong ki na kane ka jingïakob.
