Shillong, Kyllalyngkot 30 : Ka Maitshaphrang Sports Cultural Club ka la ïoh rah ïa ka nam lahduh ha ka lympung ïalehkai phutbol ba la pynlong da ka Rngibah Social Sport Club bad Rngibah Sport & Cultural Club ha ka sngi Saitjaiñ jong ka taïew ba lah dep ha madan shnong Rngibah.
Ka Rngibah Social Sport Club bad Rngibah Sport & Cultural Club ka la pynlong ïa katei ka lympung ïalehkai lyngba ka jingkyrshan pisa ka Yess Meghalaya, ha kaba u Bah Olet Kharsahnoh uwei na ki riew rangbah jong ka thaiñ Mawkynrew u la ïadonlang kum u Kongsan.
Hashwa ban sdang ka jingïalehkai la ïoh ki jingkren na u Bah Ïohbor Suting uba la long kum u symbud kongsan, na u Secretary jong ka Club bad khatduh na u Bah Olet Kharsahnoh, ïa ka jingïalang la pynïaid da u Bah Lovely Kshiar uba dei u Sordar jong ka Shnong Rngibah.
Ha katei ka jingïalehkai ki la don baroh saw tylli ki team kiba la ïashim bynta ba kynthup ka Young Boy SC, ka Maitshaphrang S&CC, ka Nangkiew Football bad ka Combined Club.
Ka Maitshaphrang S&CC ka la ïoh rah nam lahduh hadien ba ka la pynliem da 3-1 kol pyrshah ïa ka Nangkiew Football ha ka jingïakhun phainal ha katei kajuh ka sngi. Ha kane ka jingïalehkai, ki riew rangbah, ki longkmie, ki samla kynthei bad shynrang haduh ki hep kiba rit ki la wan ban sakhi bad ai mynsiem ïa la ki jong ki kynhun.
U Bah Olet Kharsahnoh haba ai jingkren u la ai khublei bad pynpaw ka jingsngewkmen ba watla ki samla jong katei ka shnong ki hap ban mad ka jingeh ha kaba ïadei bad ka leit ka wan na ka jingbym poi surok hapoh shnong hynrei, ki don pat ka sap ïalehkai kaba itynnad.
U la ong ruh ba ka thaiñ Mawkynrew kadei kawei kaba la pynmih shibun ki samla kiba mihkhmat ïa ki club kiba heh kiba ïakhun ha madan Polo, kumta u kyntu ïa ki ba kin pyndonkam hok ïa ka sap ba shisien ka sngi ma ki ruh kin sa ïoh ban mihkhmat ïa ki club ha nongbah Shillong kaban long ka jingsarong ïa ka thaiñ hi baroh kawei.
Ha kane ka sngi la pynshongshit ruh ïa ki paidbah lyngba ki jingshad na ki heprit bad ka jingrwai.
