Shillong, Risaw 06 : Ka Meghalaya Kettlebell Championship 2026 kaba la pynlong ha Kiddies Corner School, Shillong ka la khring haduh 77 ngut ki nongshim bynta ha ki kyrdan Senior bad Junior. Ïa kane ka Championship la pynlong hapoh ka jingpynïaid jong ka Girevoy Sport India Federation (GSIF), kaba ïadei bad ka World Kettlebell Sport Federation (WKSF).
Ka thong jong ka lympung ïalehkai ka long ban kyntiew bad pynroi ïa ka jingïalehkai Kettlebell bad kumjuh ruh ban pynkhlaiñ ïa ka bor met, ka jinglah ban ïaineh bad ka jinglong ryntih hapdeng ki nongïalehkai.
U Secretary jong ka GSIF, u Parag Mehtre, u la ïathuh ba ïa ka jingïalehkai Kettlebell kadei kaba la roi bha ha India la kumba 14 haduh 15 snem mynta. U ong ruh ba ha Shillong la pynlong ïa ki jingïalehkai khlem da sangeh shisien ruh mynta la hynriew snem. U la ïathuh ruh ba ka State Championship ka long ka jingïalehkai ban jied bad plie lynti ïa ki nongïalehkai sha ka National Championship, kaba la buh ban pynlong ha u Ïaïong 2027.
U Parag Mehtre u la ong shuh shuh ba Meghalaya ka don ka jinglah kaba khraw ha ka Kettlebell Sport. Kumba phra haduh shiphew ngut ki nongïalehkai na Shillong kin sa mih bynta ha ka Asia and Oceania Kettlebell Championship, kaba yn pynlong ha Goa naduh ka 23 haduh ka 25 tarik u Risaw.
Na ka liang u Bah John F. Kharshiing, Working President jong ka Meghalaya State Olympic Association, u la wan ban don lang ha kane ka sngi kum u Kongsan, katba u Kunal Mordani na Gold’s Gym, Shillong, u la wan kum u Symbud Kongsan.
Ha ka jingïalehkai la jied ruh ïa ka kynhun kaba kynthup ïa khyndai ngut ki dkhot ban mihkhmat ïa ka Meghalaya bad ïa ka India ha ka International Championship kaba ban sa long shen.
