Na u Myntri ka Sorkar Pdeng leit buddien u Myntri ban thaw noh ïa ka GTCC halor ka National Games

Shillong, Risaw 06 : Ka jingthaw ïa ka Games Technical Conduct Committee (GTCC) na ka bynta ka National Games 2027 ka la palat ïa ka por ba la buh ha u Nailur, bad ka Meghalaya ka dang ap ïa ka rai halor ka thup jong ki jingïalehkai kiba yn pynlong ha ka jylla.
U Myntri ka tnad Sports bad Youth Affairs ka sorkar jylla Bah Wailadmiki Shylla, u la ïathuh ba u la ïakynduh ïa u Myntri Sports ka Sorkar Pdeng bad kumjuh ïa ka President jong ka Indian Olympic Association (IOA), ka PT Usha, ban kyrpad ba pynsted ban thaw noh ïa ka GTCC.
Haba kren sha ki lad pathai khubor, u Myntri u la ong ba ka GTCC ka long kaba kongsan bha namar ka dei ban rai ïa ka jingbun bad ka thup jong ki jingïalehkai kiba yn pynlong ha ka National Games 2027.
“Mynta ka por ka la lyngkot bha bad haduh mynta ruh ym pat shna ïa ka Games Technical Conduct Committee. Kane ka committee ka don ïa ka bynta kaba kongsan bha, namar kan rai ïa ka jingbun ki jingïalehkai kiba yn pynlong,” u la ong.
U la ong ba ka Meghalaya ka dang ïai pynkhreh katkum ki jingïalehkai kiba la pynlong ha u snem ba la dep, hynrei ka thup kaba khatduh kan shong ha ka rai jong ka GTCC.
U Myntri u la pynpaw ruh ba ka jingpynslem ban pynbna ïa ka thup ba khatduh jong ki jingïalehkai ka lah ban ktah ïa ki jingpynkhreh jong ka jylla, khamtam ha kaba ïadei bad ki jaka ïalehkai bad kiwei ki jingdonkam.
“Lada mynta kynsan ki ïathuh ïa ngi ba kawei pat ka jingïalehkai thymmai kan wan, lehse ngim pat long kiba la pynkhreh ïa ka jaka ïalehkai. Kumta ngi donkam ïa ka por khyndiat ban pynkhreh,” u la ong.
Da kaba kdew ïa ka Host City Agreement, u Myntri u la ong ba ka GTCC ka dei ban long la kumba hynriew bnai shwa ka National Games, kaba mut ba ka por ba khatduh ban thaw ïa ka committee ka dei ban long ha u Nailur.
“Ha ka Host City Agreement la kdew shai ba ka GTCC ka dei ban long la kumba hynriew bnai shwa ka National Games, kumta ka por ba khatduh ka dei u Nailur. Mynta ngi la dep palat ïa kata ka por, dei na kane ka daw nga la leit bad ïakynduh ïa u Myntri ka tnad Sports ka Sorkar Pdeng,” u la ong.
Haba ïadei bad ka jingleit jong u sha Japan, u Myntri u la ïathuh ba u la ïakynduh ruh ïa ka President jong ka IOA, PT Usha, bad u la kyrpad ïa ka ban pynsted ïa ka jingpynlong ïa ka GTCC.
U la ong ba ka jingïatreilang jong ka IOA bad ki ophisar ka tnad Sports jong ka jylla kan ïarap ban pynbeit noh kloi ïa ka thup jong ki jingïalehkai.
Ha kajuh ka por, u Myntri u la ïathuh ba u la pan ruh ïa ka jingïarap pisa na ka Sorkar Pdeng na ka bynta ka Meghalaya ban pynkhreh ïa ka National Games.
U la bynrap ba ka PT Usha ka la kular ban pynlong ïa ka jingïalang hapoh shi taïew, ryngkat bad ki ophisar Sports na Meghalaya, bad ban khot lang ïa baroh kiba don bynta, khnang ban lah ban shim ïa ka rai halor ki jingïalehkai bad kiwei ki mat kiba ïadei bad ka National Games 2027.