Ka jingleit sha Japan ka long ban ïoh jingmut na bynta ka National Games kaban long ha Meghalaya ha u 2027 : Myntri Sports

Shillong, Risaw 06 : U Myntri ka tnad Sports bad Youth Affairs ka sorkar jylla, Bah Wailadmiki Shylla u la ong ba ka jingleit jong u bad ka kynhun dang shen sha Japan ka long ban ïoh ka jingtip bad ka jingshemphang na ka bynta ban pynlong ïa ka National Games 2027 ha Meghalaya ha u snem ban wan.
Ha kaba kyntait ïa ki jingkam ba Meghalaya kam don ki nongïalehkai ba mihkhmat ha ka lympung ïalehkai jong ka dewbah Asia ne Asian Games, u Myntri u la ong, “Ka long kaba bakla shibun ban ong kumta namar ngi don ïa uwei u nongïalehkai para-athlete (ba don jingthut ha ka dkhot met) ba mihkhmat ïa ka ri ha ka Asian Para Games. Hynrei ka jingleit kam dei satia na bynta ki nongïalehkai hynrei ka dei beit ban ïoh jingmut bad ka jingshemphang namar ha u snem ban wan ngin pynlong ïa ka National Games, kaba dei ka lympung ïalehkai kaba heh tam ha ka Ri.”
U la kdew ba ka Asian Games bad ka National Games ki long kiba ïasyriem ha ka rukom pynlong.
“Lada phi ïanujor ïa ka Asian Games bad ka National Games, ym don jingïapher shibun ha ka liang jong ka jingbun ki nongïalehkai, lehse tang 2,000 haduh 3,000 ka jingïapher,” u la ong.
U Myntri u la ong ba ka jingleit ka dei ruh da ka jingthmu ban sngewthuh ïa ka rukom pynïaid ïa ki lympung ïalehkai kiba heh.
“Namarkata ngi la pyrkhat ba kane ka dei ka lad kaba bha tam ïa ngi ban leit bad ban nang na ki, ban ïohi kumno ka jingpynkhreh ka ïaid. Ngi kwah ban ïohi ïa ki jingtei, ki jingpynbeit bad baroh kiwei pat,” u la ong.
U Myntri u la ong ba ha ka kynhun leit jngoh la synrap lang ruh da ki heh ophisar ba dei khmih ïa ka sports.
“Namarkata ngi la pyrkhat ba kane ka dei ka lad kaba biang tam ha kaba nga la shim ym tang ïa ki ophisar na ka Sports Department hynrei la ïa leit lang naduh President bad Secretary jong ka Meghalaya State Olympic Association, Director, Joint Director, bad ka kynhun technical jong ngi ban ïohi kumno ngi lah ban pynbha shuh shuh ïa ka kam hangne ha Meghalaya,” u la ong.
“Don bun ki bynta kiba ngi lah ban ïoh jingmut na kane namar kane ka dei ka jingïalang kaba heh ïa ngi, khamtam eh ïa ka Meghalaya,” u la bynrap biang.