Ha ka sien kaba nyngkong, lum ka MSOA ïa ki rangkynsai jong ka jylla

0

Shillong, Kyllalyngkot 30 : Ha ka sien kaba nyngkong ha ka 30 tarik Kyllalyngkot 2023 ha ka por 4.30 janmiet ka MSOA ka la lum lang ïa ki rangkynsai jong ka jylla kiba la mih khmat ïa ka Ri India ban ïasyllok halor ka phang kilan met (sports) hapoh jylla.
Ha kane ka sngi ki don kumba 12 ngut ki rangkynsai kynthei bad shynrang na ka Football bad Karate bad napdeng jong kine la wan ruh u Bah Fullmoon Pyrtuh u nongïalehkai football ba la paw uba la mih ïalehkai shabar jylla naduh ki snem 1983.
Ha katei ka jingïasyllok la pynïaid ïa ka jingïalang da u Bah John F Kharshiing, Working President, ha ka jingïadonlang u Bah Finely L Pariat, General Secretary, u Bah Ksan Warjrri, Treasurer, U Bah P Laloo, bad Bah Dipshon Rynthathiang, uba long ruh u Chairman, Podium Finish Committee, bad kiba long ki dkhot jong ka MSOA
Hadien ka jingïasyllok kaba bniah katei ka jingïakynduh ka la rai ban khot ïa baroh ki State Association bad ïa ki nongïalehkai ka jylla kiba la mihkhmat ïa ka Ri India (international Athletes) ba kin phah ïa ka bio data lane ka CV jong kito ki nongïalehkai na ka jylla kiba la mih khmat na ka bynta ka Ri India bad ruh ban ai jingpynbna lyngba ki kotkhubor ba ba kitei ki nongïalehkai kiba paw kiba rim bad kiba mynta ba kin phah ïa kitei ki jingtip kyrkieh sha ka office jong ka Meghalaya State Olympic Association ha ka email megh_olym_asscn@yahoo.com lane lyngba ki State Association ha lane shwa ka 20 tarik Rymphang 2023 khnang ban ïoh ban lum sa kawei pat ka jingïalang jong baroh kiba la mihkhmat na ka bynta ka Ri India hadien kane ka elekshon MLA 2023.
Shuh shuh katei ka jingïalang ka la pynpaw ka jingaikhublei ïa ka MSOA ba la khot ïa kum kane ka jingïakynduh kaba ym pat juh don ba khot bad ki la ai jingmut ba la donkam ban don ka jingïakynduh sa shisien ar sien jong baroh ki nongïalehkai kiba la mihkhmat na ka bynta ka Ri India khnang ban thaw ka kynhun kaba kyrpang ban kren halor ki jingeh jong kitei kiba la wanrah burom ïa ka Ri.
Na ka Liang u Bah John F Kharshiing, Working President, bad u Bah Finely L Pariat, General Secretary, Meghalaya State Olympic Association (MSOA) ki la ong ba hadien ba la mih ka Sports Policy la sngewdonkam ban khot ïa ki nongïalehkai kiba la mihkhmat na ka India ban ïasyllok kumno ban pyntyllun ïa ka sports policy ban ïoh ïa ka jingaijingmut jong ki halor ka jingpynkhreh ïa ka National Games bad namar ka Meghalaya Sports Policy 2019 ba la pynbna ka kular ba ki nongïalehkai kiba la mihkhmat na ka Ri India (India International Athletes) kin ïoh ïa ka sports pension, kin ïoh ïa ka jingmyntoi lyngba ka reservation policy kaba 15% ha ki kam pulit, home guards bad 10% ha kiwei pat ki kam Sorkar. Kumta na ka liang ka MSOA ki la sngewdonkam ban ïoh ïa kane ka jingïakynduh ban pyntyllun ïa ki kam shakhmat.
Halor ki jingaijingmut kiba bun katei ka jingïakynduh ka la shim ïa ka rai ban pynlong biang sa kawei ka jingïakynduh kum shibynta ban ïoh ban saiñdur ïa ka lawei jong ki nongïalehkai kiba la mih khmat na ka bynta ka jylla.

Leave A Reply

Your email address will not be published.