Shillong, Naiwieng 03 : Ka Mawlai SC ka la lah ban tehlakam naduh ba sdang haduh kaba kut jong ka jingïalehkai tad haduh ba kan da lah ban pynliem haduh 3-0 kol ïa ka Lamlynti FC, ha ka jingïalehkai sdang jong ka SSA Champions Cup 2026, kaba long ha ka sngi Baar ha SSA Stadium, Polo.
Ïa kine ki lai tylli ki kol ka Mawlai SC, la ïoh ban thep da u Damanbhalang Chyne ha ka minit kaba 21, nangta na u Ricky Chyne ha ka minit kaba 27 bad ruh na u Arkibor Makhroh ha ka minit kaba 48.
Ha shwa ban sdang jong kane ka jingïakhun la ïoh ruh ïa ka jingkitbok na u Working President ka SSA, Bah Robert Dkhar bad ki dkhot ki jong ka.
Kumban shu kdew hangne, ka kynhun ïalehkai jong ka Lamlynti FC kaba wan ba-ar na ka lympung ïalehkai jong ka Third Division mynta ka samoi kumta ka la mad ïa ka jingïakhun kaba eh bha khamtam ban ïoh aireng ïa ki kynhun ba khlainbor kum ka Mawlai SC, ka kynhun kaba rah ïa ka nam kum ka lahduh ka SPL.
Pynban, kane kam shim la lah than eh ba kan pynkhlain ïa ka kynhun kaba ka kol kaba nyngkong u Damanbhalang ka long kaba itynnad tad haduh ba u Nister Roy Suting um lah ban leh eiei shuh ban khanglad ïa ka ba kan rung sha ka kol. Ka kol kaba ar lyngba u Ricky, kaba hangne ruh u Nister um shim la lah ban khanglad ïa ka bol ba kan ïoh pynkhih ïa ka jar.
Kaba nang pynduh mynsiem shuh shuh ïa ka Lamlynti FC ka dei ka jingshah thep kham kloi ïa ka kol kaba lai, kaba la jia marsien ïa sdang jong ka kylla miet lyngba u Arkibor, kaba hangne ka la long shisha ka jingkyndit ïa ka kynhun baroh kawei namar tang hapoh ki 48 minit ki la shah thep haduh lai kol.
Hadien ba la lah ban ïoh thep ïa kine ki lai tylli ki kol, ka rukom ïalehkai ka Mawlai SC, ka la sdang ba kan da kylla ha kaba ka la ïoh ruh ïa ka kabu ba kan pyndonkam ïa baroh ki san tylli ki jingkylliang nongïalehkai jong ka, kaba long kum shi bynta ka jingplie lad ïa ki rangïalehkai ba shah pynshong ben ba kin ïoh ban ïa mih madan, kampher wat hadien kane, ka jingïakhun ka khlem don shuh pat ka jingthep ïa ki kol.
Lashai pat ka sngi kan dei biang jong ka Group A ha kaba ka Nongkrem SC kaba wan ba-ar ha ka ka First Division kan mih madan ban ïakhun pyrshah ïa ka lahduh ka Second Division ka Mawpat SC, kaban long ha ka por 2:30 nohphai sngi.
