La thaw ïaka MCTODA Jaiñtia Unit ban dawa pynkiew ïaka bai kit na ki karkhana: President

Jowai, Lber 03: Ka Meghalaya Commercial Truck Owners and Drivers Association (MCTODA) Jaiñtia Unit lyngba u President jong ka u ma Heibormi Pariat haka jingkren sha ki ladpathai khubor mynta ka sngi ula pynsngew ba ïa kane seng la seng hapoh ka Ri-lum Jaiñtia haka 26 tarik u Rymphang, 2025 bad kane ka seng kan ïarap ïa ki trai truck bad ki nongñiah halor ka dor jong ka bai kit bai bah ïa ki mar ki mata kiba mih napoh ka jylla Meghalaya.
U la ong ki don shibun ki kam kiba kane ka seng kala dep leh sa kiwei ki District ka jylla kata ban pynduh pyndap ïa ki jaka lum khajna na ki trok kiba dei jong ki Council bad kane kala ïarap shibun eh ïa ka leit ka wan jong ki.
Kumba long mynta kane ka seng kala treikam kam bha ha ki District jong ka South West Khasi Hills, East Khasi Hills, West Khasi Hills, Ri-Bhoi bad mynta kala sdang ban suh thied sa ha Jaiñtia Hills, ula kren shai kane ka Association kan peit sani ïa ka jingeh bad dawa pynkiew ïa ka bai kit jong ki mar ki mata na ki karkhana bapher bapher.
Katba u General Secretary ka seng u Shanborlang Suchiang ula pynsngew ïa ki jingeh ba ki trai truck bad ki nongñiah ki ïa kynduh ha ka por ba kit ïa ki mar ki mata, namar wat ïa ka bai nong kab ki dei ban siew (kisti) kam dap shuh ban siew sha ki Bank, da kaba ai nuksa ïa ka bai kali ba kit ïa u Coke ka long tang 1200 shiton. Kumta ban teh lakam ïa kane ka jingeh donkam ïa ka seng kaba treihok ïa ka kam ban ïakhun borbah na ka bynta ka hok jong ki.
U buh ruh ka jingkyrpad ïa ki Karkhana bapher bapher hapoh ka Ri-Lum Jaiñtia ba kim dei ban pyndonkam da ki kali la jong haba kit ïa ki mar ki mata jong ki namar kane ka ktah shibun eh ïa ki kum ki trai jylla, da kaba kyntu jur ïa kitei ki Karkhana “ki trai jylla ki dei ban ïoh nong nyngkong ha ka kit ka bah ïa ki mar ma pynmih napoh ka jylla”, khnang ba kin lah ban pyndap pynbiang ïa ka ïing ka sem kumjuh.
U la pyntip ïa baroh ki dkhot jong ka seng ba ki dei ban long kiba ïatylli lang kawei haba don kino kino ki kam ban dawa ïa ka hok kum ki trai truck bad ki nongñiah khnang ba kan long kaba jop. U buh ruh ka jingkyntu ïa kiwei de ki seng ba kin ïasnohkti lang bad kane ka seng na ka bynta ki kam ba bha jong ki Trai bad nongñiah trok.
Ki nongkitkam ka MCTODA-Jaiñtia Unit ki long President: Shri. Heibormi Pariat, General Secretary: Shri. Shanborlang Suchiang, Vice-President: Shri. Robel Pakma, Joint Secretary: Shri. Wanshan Laloo, Treasurer: Shri. Kerson Suchiang, Finance Secretary: Shri. Ialam Dkhar
U ma Pariat ula ong kino kino kiba sngewdonkam ban ïakren halor kane kin sngewbha ban phone ha kine ki number 9862266318 / 8787464347 kiba dei jong u President bad u General Secretary ka MCTODA-Jaiñtia Unit.